വിമാന ഗതാഗത നിയന്ത്രണ സംവിധാനത്തിലുണ്ടായ സാങ്കേതിക തകരാറിനെത്തുടർന്ന് അമേരിക്കയിലുടനീളം വിമാന സർവീസുകൾക്ക് നിയന്ത്രണം ഏർപ്പെടുത്തി ഫെഡറൽ ഏവിയേഷൻ അഡ്മിനിസ്ട്രേഷൻ (എഫ്.എ.എ). വെള്ളിയാഴ്ചയുണ്ടായ തകരാറിനെ തുടർന്ന് കുറഞ്ഞത് 7,000 വിമാന സർവീസുകളെങ്കിലും തടസ്സപ്പെടുകയോ റദ്ദാക്കുകയോ ചെയ്തതായി റോയിട്ടേഴ്സ് റിപ്പോർട്ട് ചെയ്തു.
രാജ്യത്തെ എല്ലാ എയർ ട്രാഫിക് കൺട്രോൾ സെന്ററുകളെയും തകരാർ ബാധിച്ചതായി ഗതാഗത സെക്രട്ടറി ഷോൺ ഡഫി അറിയിച്ചു. പ്രശ്നം പരിഹരിച്ച് സർവീസുകൾ പുനരാരംഭിക്കാനായില്ലെങ്കിൽ കൂടുതൽ വിമാനക്കമ്പനികൾ സർവീസുകൾ താൽക്കാലികമായി നിർത്തിവെച്ചേക്കുമെന്നും റിപ്പോർട്ടുകളുണ്ട്.
ടെലികമ്മ്യൂണിക്കേഷൻ സംവിധാനത്തിലുണ്ടായ തകരാറാണ് പ്രതിസന്ധിക്ക് കാരണമെന്നാണ് പ്രാഥമിക റിപ്പോർട്ടുകൾ. സൈബർ ആക്രമണവുമായി ബന്ധപ്പെട്ടതാണ് പ്രശ്നമെന്നതിന് തെളിവുകളില്ലെന്നും അധികൃതർ വ്യക്തമാക്കി. 2001 സെപ്റ്റംബർ 11 ആക്രമണങ്ങൾക്ക് ശേഷമുള്ള രണ്ടാമത്തെ രാജ്യവ്യാപക വിമാന നിയന്ത്രണമാണിത്.
അതേസമയം, മൈക്രോസോഫ്റ്റ് സേവനങ്ങളിലുണ്ടായ ആഗോള തടസ്സവുമായി വിമാന ഗതാഗത പ്രതിസന്ധിക്ക് ബന്ധമില്ലെന്ന് യു.എസ് ഹോംലാൻഡ് സെക്യൂരിറ്റി സെക്രട്ടറി മാർക്ക് വെയിൻ മുള്ളിൻ പറഞ്ഞു.
