മന്ത്രിമാരുടെയും എംഎൽഎമാരുടെയും ശമ്പളവും ആനുകൂല്യങ്ങളും വർധിപ്പിച്ച സർക്കാർ നടപടിക്കെതിരെ ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖർ. വർധിപ്പിച്ച ശമ്പളവും അലവൻസും സ്വീകരിക്കില്ലെന്നും ലഭിക്കുന്ന അലവൻസുകൾ മണ്ഡലത്തിന്റെ വികസനത്തിനായി ചെലവഴിക്കുമെന്നും അദ്ദേഹം വ്യക്തമാക്കി. സാമ്പത്തിക പ്രതിസന്ധിക്കിടെ ശമ്പളം വർധിപ്പിച്ച സർക്കാർ തീരുമാനം തെറ്റാണെന്നും രാജീവ് ചന്ദ്രശേഖർ പറഞ്ഞു.
മന്ത്രിമാരുടെയും എംഎൽഎമാരുടെയും ശമ്പളവും ആനുകൂല്യങ്ങളും വർധിപ്പിക്കുന്നതിനുള്ള ബിൽ ഭരണ-പ്രതിപക്ഷ അംഗങ്ങളുടെ പിന്തുണയോടെ നിയമസഭ പാസാക്കിയിരുന്നു. മുൻ എംഎൽഎമാരുടെ പെൻഷനും വർധിപ്പിച്ചിട്ടുണ്ട്. 2018ലാണ് ഇതിനുമുമ്പ് സംസ്ഥാനത്ത് ജനപ്രതിനിധികളുടെ ശമ്പളം പരിഷ്‌കരിച്ചത്.
പുതിയ നിരക്കുകൾ പ്രകാരം എംഎൽഎമാരുടെ പ്രതിമാസ ആനുകൂല്യങ്ങൾ 70,000 രൂപയിൽ നിന്ന് 98,000 രൂപയായും മന്ത്രിമാരുടേത് 1.08 ലക്ഷം രൂപയിൽ നിന്ന് 1.33 ലക്ഷം രൂപയായും ഉയരും. മണ്ഡലം അലവൻസ്, യാത്രാബത്ത, ഇന്ധന കൂപ്പൺ തുക എന്നിവയിലും വർധന വരുത്തിയിട്ടുണ്ട്. പലിശരഹിത വാഹന വായ്പയുടെ പരിധിയും ഉയർത്താൻ തീരുമാനിച്ചു.
ഉയർന്ന ദൈനംദിന ചെലവുകൾ കാരണം ജനപ്രതിനിധികൾ ബുദ്ധിമുട്ടുകൾ നേരിടുന്നുണ്ടെന്ന് സ്പീക്കർ തിരുവഞ്ചൂർ രാധാകൃഷ്ണൻ ചൂണ്ടിക്കാട്ടി. തർക്കങ്ങളില്ലാതെ ബിൽ പാസാക്കിയ നടപടിയെ അദ്ദേഹം അഭിനന്ദിക്കുകയും ചെയ്തു. എംഎൽഎമാർക്ക് ഒരു പി.എയെക്കൂടി അനുവദിക്കണമെന്ന സ്പീക്കറുടെ നിർദേശം അനുഭാവപൂർവം പരിഗണിക്കാമെന്ന് മുഖ്യമന്ത്രി മറുപടി നൽകി. ബിൽ പാസാക്കിയതിന് പിന്നാലെ നിയമസഭ അനിശ്ചിതകാലത്തേക്ക് പിരിഞ്ഞു.
