മലയാള ചലച്ചിത്ര അഭിനേതാക്കളുടെ സംഘടനയായ ‘അമ്മ’യുടെ എക്സിക്യൂട്ടീവ് അംഗമായ നടൻ ടിനി ടോമിനെതിരെ നടി അൻസിബ ഹസൻ നൽകിയ പരാതിയിൽ പോലീസ് പ്രാഥമിക അന്വേഷണം ആരംഭിച്ചു. ടിനി ടോം തന്നെ മതതീവ്രവാദിയാക്കാൻ ശ്രമിച്ചു എന്ന് ചൂണ്ടിക്കാണിച്ചാണ് അൻസിബ പോലീസിനെ സമീപിച്ചത്.
ഇതേതുടർന്ന്, കേസിൽ കടവന്ത്ര പോലീസ് വരും ദിവസങ്ങളിൽ അൻസിബയുടെ വിശദമായ മൊഴി രേഖപ്പെടുത്തും. നടി അൻസിബ ആദ്യം ഇൻഫോപാർക്ക് പോലീസിലാണ് പരാതി നൽകിയിരുന്നത്. എന്നാൽ, ഇത് പിന്നീട് തുടർനടപടികൾക്കായി കടവന്ത്ര പോലീസ് സ്റ്റേഷനിലേക്ക് കൈമാറുകയായിരുന്നു.
വരാനിരിക്കുന്ന തിങ്കളാഴ്ച അൻസിബയുടെ കൃത്യമായ മൊഴി രേഖപ്പെടുത്തിയ ശേഷം, അത് വിശദമായി പരിശോധിച്ച ശേഷമായിരിക്കും ടിനി ടോമിനെ ചോദ്യം ചെയ്യാൻ വിളിക്കുന്ന കാര്യത്തിൽ പോലീസ് അന്തിമ തീരുമാനമെടുക്കുക.
