ശബരിമലയിൽ ഭക്തർ സമർപ്പിച്ച സ്വർണക്കിരീടം നഷ്ടപ്പെട്ടിട്ടില്ലെന്നും അത് സുരക്ഷിതമായി സൂക്ഷിച്ചിട്ടുണ്ടെന്നും തിരുവിതാംകൂർ ദേവസ്വം ബോർഡ് പ്രസിഡന്റ് കെ. ജയകുമാർ വ്യക്തമാക്കി. കിരീടം ശബരിമലയിൽ ഇല്ലെങ്കിൽ ആറൻമുളയിലെ തിരുവാഭരണ ശേഖരത്തിലുണ്ടാകുമെന്നും, ഇക്കാര്യം തിരുവാഭരണം കമ്മീഷണറുടെ റിപ്പോർട്ടിലൂടെ സ്ഥിരീകരിക്കുമെന്നും അദ്ദേഹം പറഞ്ഞു.
സ്വർണക്കിരീടവുമായി ബന്ധപ്പെട്ട് ഉയർന്ന ആശങ്കകൾക്കിടെയാണ് ദേവസ്വം ബോർഡിന്റെ വിശദീകരണം. വിഷയത്തിൽ വ്യക്തത വരുത്തുന്നതിനായി തിരുവാഭരണം കമ്മീഷണറെ നേരിട്ട് വിളിച്ചുവരുത്തിയിട്ടുണ്ടെന്നും ബോർഡ് അറിയിച്ചു.
കിരീടം കാണാതായെന്ന തരത്തിൽ പ്രചരിച്ച വാർത്തകൾ അടിസ്ഥാനരഹിതമാണെന്നും, കിരീടം സുരക്ഷിതമായി സൂക്ഷിച്ചിട്ടുണ്ടെന്നും തിരുവാഭരണം കമ്മീഷണർ സമർപ്പിച്ച റിപ്പോർട്ടിൽ വ്യക്തമാക്കിയിട്ടുണ്ടെന്ന് ദേവസ്വം ബോർഡ് അറിയിച്ചു. അതേസമയം, ക്ഷേത്രത്തിലെ മറ്റ് ചില വസ്തുക്കളുടെ കണക്കുകളുമായി ബന്ധപ്പെട്ട് നിലനിൽക്കുന്ന സംശയങ്ങൾ പരിശോധിച്ചുവരികയാണെന്നും അധികൃതർ വ്യക്തമാക്കി.
തമിഴ്നാട്ടിൽ നിന്നുള്ള ഭക്തർ 2012-ൽ സമർപ്പിച്ച 55.72 പവൻ തൂക്കമുള്ള സ്വർണക്കിരീടം കാണാതായെന്ന തരത്തിലുള്ള റിപ്പോർട്ടുകളാണ് കഴിഞ്ഞ ദിവസങ്ങളിൽ പ്രചരിച്ചത്. എന്നാൽ കിരീടം സുരക്ഷിതമാണെന്നും ഇക്കാര്യത്തിൽ അനാവശ്യ ആശങ്കകൾ വേണ്ടെന്നും ദേവസ്വം ബോർഡ് ആവർത്തിച്ചു.
