പാക് അധീന കശ്മീരിൽ സംയുക്ത അവാമി ആക്ഷൻ കമ്മിറ്റി സംഘടിപ്പിച്ച ലോങ് മാർച്ചിനിടെ ഉണ്ടായ സംഘർഷങ്ങളിലും സുരക്ഷാസേനയുടെ നടപടികളിലും കുറഞ്ഞത് 20 പേർ കൊല്ലപ്പെട്ടതായി റിപ്പോർട്ട്. നിരവധി പേർക്ക് ഗുരുതരമായി പരിക്കേറ്റിട്ടുണ്ടെന്നും മരണസംഖ്യ ഇനിയും ഉയരാനിടയുണ്ടെന്നും ജെഎഎസി അറിയിച്ചു.
ചൊവ്വാഴ്ച എക്സിൽ പങ്കുവെച്ച പ്രസ്താവനയിലാണ് ജെഎഎസി മരണവിവരങ്ങൾ പുറത്തുവിട്ടത്. റാവലകോട്ട് നഗരത്തിലെത്തിയ ലോങ് മാർച്ച് സംഘങ്ങളുമായി ബന്ധപ്പെട്ട് ഇതുവരെ 19 മരിച്ചവരുടെ തിരിച്ചറിയൽ സ്ഥിരീകരിച്ചതായും, തലയിൽ വെടിയേറ്റ നിലയിൽ കണ്ടെത്തിയ മറ്റൊരാളുടെ മൃതദേഹം പാലന്ദ്രി ആശുപത്രിയിൽ സൂക്ഷിച്ചിരിക്കുന്നതായും സംഘടന വ്യക്തമാക്കി. ഇതോടെ മരണസംഖ്യ കുറഞ്ഞത് 20 ആയതായി ജെഎഎസി അവകാശപ്പെട്ടു.
റാവലകോട്ട് നഗരത്തിലെ ചാന്ദ്നി ചൗക്കിൽ പ്രതിഷേധക്കാർ തുടരുകയാണെന്നും പകൽ വെളിച്ചം ലഭിച്ച ശേഷം ഷാഹിദ് ചൗക്കിൽ പൊതുസമ്മേളനം സംഘടിപ്പിച്ച് തുടർ സമരപരിപാടികൾ പ്രഖ്യാപിക്കുമെന്നും സംഘടന അറിയിച്ചു.
ജെഎഎസിയും പാകിസ്ഥാൻ ഭരണകൂടവും തമ്മിൽ നടന്ന ചർച്ചകൾ പരാജയപ്പെട്ടതിനെ തുടർന്നാണ് ലോങ് മാർച്ച് സംഘടിപ്പിച്ചത്. ജനകീയ ആവശ്യങ്ങളിൽ പരിഹാരം കാണുന്നതിൽ സർക്കാർ പരാജയപ്പെട്ടുവെന്നാരോപിച്ചാണ് സംഘടന ജനങ്ങളെ വീണ്ടും അണിനിരത്താൻ ആഹ്വാനം ചെയ്തത്.
മിർപൂർ ഡിവിഷനിൽ നിന്ന് ഞായറാഴ്ച ആരംഭിച്ച മാർച്ച്, റാവലകോട്ടിൽ വിവിധ സംഘങ്ങൾ ഒന്നിച്ചുചേർന്നതിന് ശേഷം മുസാഫറാബാദിലേക്ക് നീങ്ങുകയായിരുന്നു. ഇതിന് പിന്നാലെയാണ് സംഘർഷാവസ്ഥ രൂക്ഷമായത്.
അതേസമയം, യുണൈറ്റഡ് കശ്മീർ പീപ്പിൾസ് നാഷണൽ പാർട്ടി (യുകെപിഎൻപി) പാക് അധീന കശ്മീരിൽ നടക്കുന്ന സംഭവങ്ങളിൽ അന്താരാഷ്ട്ര സമൂഹം അടിയന്തരമായി ഇടപെടണമെന്ന് ആവശ്യപ്പെട്ടു. റാവലകോട്ടിൽ സമാധാനപരമായി പ്രതിഷേധിച്ച ജനങ്ങൾക്കെതിരെ പാകിസ്ഥാൻ സുരക്ഷാസേന അമിത ബലപ്രയോഗം നടത്തിയെന്നാണ് സംഘടനയുടെ ആരോപണം.
പ്രതിഷേധക്കാർക്കെതിരെ വെടിവെപ്പ്, കനത്ത ഷെല്ലാക്രമണം, കണ്ണീർവാതക പ്രയോഗം എന്നിവ നടന്നതായും ഇതുമൂലം നിരവധി സാധാരണക്കാർ കൊല്ലപ്പെടുകയും പരിക്കേൽക്കുകയും ചെയ്തതായും യുകെപിഎൻപി ആരോപിച്ചു. സംഭവങ്ങളെക്കുറിച്ചുള്ള സ്വതന്ത്ര അന്വേഷണം നടത്തണമെന്നും മനുഷ്യാവകാശ ലംഘനങ്ങൾ പരിശോധിക്കണമെന്നും സംഘടന ആവശ്യപ്പെട്ടു.
സംഭവവുമായി ബന്ധപ്പെട്ട് പാകിസ്ഥാൻ അധികൃതരുടെ ഔദ്യോഗിക പ്രതികരണം ഇതുവരെ പുറത്തുവന്നിട്ടില്ല.
