മഹാരാഷ്ട്ര മുഖ്യമന്ത്രി ദേവേന്ദ്ര ഫഡ്‌നാവിസിനെതിരെ രൂക്ഷ വിമർശനവുമായി കോക്രോച്ച് ജനതാ പാർട്ടി (സിജെപി) സ്ഥാപകൻ അഭിജിത് ദീപ്കെ. ഒക്ടോബർ 2 മുതൽ പാർട്ടി പ്രഖ്യാപിച്ചിരിക്കുന്ന പ്രതിഷേധങ്ങളുടെ പശ്ചാത്തലത്തിൽ സർക്കാർ തന്ത്രപരമായ പിഴവുകൾ വരുത്തരുതെന്ന് അദ്ദേഹം മുന്നറിയിപ്പ് നൽകി. വേണമെങ്കിൽ തന്നെ ഇപ്പോൾ തന്നെ അറസ്റ്റ് ചെയ്യാമെന്നും ദീപ്കെ വെല്ലുവിളിച്ചു.
മുംബൈയിൽ നടന്ന മാധ്യമസമ്മേളനത്തിൽ സംസാരിക്കവെ, കേന്ദ്ര തിരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെ ഗുരുതര ആരോപണങ്ങളും ദീപ്കെ ഉന്നയിച്ചു. രാജ്യത്തെ വോട്ടർ പട്ടികയിൽ വ്യാപകമായ ക്രമക്കേടുകൾ നടന്നിട്ടുണ്ടെന്നും ഗ്യാനേഷ് കുമാർ രാജിവയ്ക്കണമെന്നും അദ്ദേഹം ആവശ്യപ്പെട്ടു. രാജ്യത്തുടനീളമുള്ള 13 കോടി വോട്ടർമാരുടെ പേരുകൾ ഇല്ലാതാക്കിയിട്ടുണ്ടെന്നും അവരെല്ലാം റോഡിലിറങ്ങിയാൽ, ഗ്യാനേഷ് കുമാറിന്റെ മേലധികാരികളുടെ രാജി ജനങ്ങൾ ആവശ്യപ്പെടുമെന്നും അദ്ദേഹം മുന്നറിയിപ്പ് നൽകി.
പ്രത്യേക തീവ്ര പരിഷ്കരണ നടപടികൾ നിർത്തിവച്ച് 2005ലെ വോട്ടർ പട്ടികയുടെ അടിസ്ഥാനത്തിൽ മാത്രം തിരഞ്ഞെടുപ്പ് നടത്തണമെന്ന ആവശ്യവും ദീപ്കെ മുന്നോട്ടുവച്ചു. ഗ്യാനേഷ് കുമാറിന്റെ രാജി ആവശ്യപ്പെട്ട് ഒക്ടോബർ 2 മുതൽ മുംബൈയിൽനിന്ന് രാജ്യവ്യാപക പ്രതിഷേധം ആരംഭിക്കുമെന്ന് സിജെപി നേരത്തെ പ്രഖ്യാപിച്ചിരുന്നു.
പ്രതിഷേധക്കാരെ മൂന്ന് ദിവസത്തേക്ക് ജയിലിലടയ്ക്കുമെന്ന ഫഡ്‌നാവിസിന്റെ പരാമർശത്തോടും ദീപ്കെ പ്രതികരിച്ചു. മൂന്ന് ദിവസത്തേക്കല്ല, മൂന്ന് മാസത്തേക്കും ആവർത്തിച്ച് തെരുവിലിറങ്ങുമെന്നും അദ്ദേഹം പറഞ്ഞു. പ്രതിഷേധങ്ങൾക്ക് പോലീസിന്റെ അനുമതി ആവശ്യമില്ലെന്നും സ്വാതന്ത്ര്യസമരകാലത്ത് മഹാത്മാഗാന്ധി ബ്രിട്ടീഷുകാരിൽ നിന്ന് അനുമതി തേടിയിരുന്നില്ലെന്നും അദ്ദേഹം അവകാശപ്പെട്ടു.
ഒക്ടോബർ 4ന് പ്രതിപക്ഷ പാർട്ടികൾ സംഘടിപ്പിക്കുന്ന സംയുക്ത പ്രതിഷേധത്തിന് സിജെപി പൂർണ പിന്തുണ നൽകുമെന്നും ദീപ്കെ അറിയിച്ചു. രാജ്യവ്യാപക പര്യടനം നടത്തുന്നതിനിടയിലും മുംബൈയിലെ പ്രതിഷേധത്തിൽ സിജെപി പ്രവർത്തകർ വലിയ തോതിൽ പങ്കെടുക്കുമെന്നും അദ്ദേഹം പറഞ്ഞു.
തന്റെ 30,000 രൂപ വിലയുള്ള ഷൂസിനെതിരായ വിമർശനങ്ങൾക്കും ദീപ്കെ മറുപടി നൽകി. അത് വാങ്ങാൻ കഴിയുന്നതിനാലാണ് വാങ്ങിയതെന്നും ഒരു ആരാധക നിമിഷം മാത്രമായിരുന്നുവെന്നും അദ്ദേഹം പറഞ്ഞു.
