തമിഴ്നാട്ടിലെ രാഷ്ട്രീയത്തിൽ നിർണായക നീക്കം. മുഖ്യമന്ത്രി സി. ജോസഫ് വിജയ് നയിക്കുന്ന തമിഴക വെട്രി കഴകം തമിഴ്നാട്ടിലെ ഇന്ത്യാ സഖ്യത്തിന്റെ ഭാഗമായതായി ടിഎൻസിസി പ്രസിഡന്റ് ബി. മാണിക്കം ടാഗോർ അറിയിച്ചു. ശനിയാഴ്ച ചെന്നൈയിലെ സത്യ മൂർത്തി ഭവനിൽ ചേർന്ന ഇന്ത്യാ സഖ്യത്തിന്റെ യോഗത്തിലാണ് ടിവികെ ആദ്യമായി ഔദ്യോഗികമായി പങ്കെടുത്തത്.
ടിവികെ ജനറൽ സെക്രട്ടറി (ഇലക്ഷൻ മാനേജ്മെന്റ്) കൂടിയായ മന്ത്രി ആധവ് അർജുനയും ധനമന്ത്രി എൻ. മാരി വിൽസണും യോഗത്തിൽ പാർട്ടിയെ പ്രതിനിധീകരിച്ചു. ടിവികെ യോഗത്തിൽ പങ്കെടുത്തത് തന്നെ സഖ്യത്തിന്റെ ഭാഗമായുള്ള ഔദ്യോഗിക നിലപാടാണെന്ന് ആധവ് അർജുന വ്യക്തമാക്കി.
കോൺഗ്രസ്, ടിവികെ, സിപിഐ(എം), സിപിഐ, വിസികെ, എംഡിഎംകെ, ഐയുഎംഎൽ എന്നീ കക്ഷികളുടെ നേതാക്കളാണ് യോഗത്തിൽ പങ്കെടുത്തത്. ടിവികെയുടെ സഖ്യപ്രവേശനം ‘ചരിത്രപരമായ ദിവസം’ എന്നാണ് മാണിക്കം ടാഗോർ വിശേഷിപ്പിച്ചത്. ടിവികെ കൂടി എത്തിയതോടെ തമിഴ്നാട്ടിലെ ഇന്ത്യാ സഖ്യത്തിന്റെ ഘടന കൂടുതൽ വിപുലമായതായി അദ്ദേഹം പറഞ്ഞു.
അതേസമയം, പ്രത്യേക തീവ്ര വോട്ടർപട്ടിക പുതുക്കൽ (SIR) നടപടിയുമായി ബന്ധപ്പെട്ട് മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് പ്രതിഷേധം സംഘടിപ്പിക്കാനും യോഗത്തിൽ തീരുമാനിച്ചു. ഒക്ടോബർ 13, 14 തീയതികളിൽ സംസ്ഥാനത്തെ ജില്ലാതല ആസ്ഥാനങ്ങളിൽ പ്രതിഷേധം നടത്തും. ഒക്ടോബർ 15ന് ചെന്നൈയിൽ സംയുക്ത പ്രതിഷേധവും സംഘടിപ്പിക്കും.
ടിവികെ നേതാക്കൾ ഉൾപ്പെടെയുള്ള സഖ്യകക്ഷി പ്രതിനിധികൾ പ്രതിഷേധ പരിപാടികളിൽ പങ്കെടുക്കുമെന്ന് നേതാക്കൾ അറിയിച്ചു. ടിവികെ അധ്യക്ഷൻ വിജയ് യോഗത്തിൽ നേരിട്ട് പങ്കെടുത്തില്ലെങ്കിലും, അദ്ദേഹത്തിന്റെ നിർദേശപ്രകാരമാണ് രണ്ട് മന്ത്രിമാർ യോഗത്തിൽ പങ്കെടുത്തതെന്ന് ആധവ് അർജുന പറഞ്ഞു.
തമിഴ്നാട്ടിലെ ഈ നീക്കം സംസ്ഥാനത്തെ വിവിധ രാഷ്ട്രീയ കൂട്ടുകെട്ടുകൾക്കിടയിലെ പുതിയ ക്രമീകരണങ്ങൾക്ക് വഴിയൊരുക്കുന്ന സംഭവവികാസമായാണ് വിലയിരുത്തപ്പെടുന്നത്.
