സംസ്ഥാനത്തെ മരുന്ന് ക്ഷാമത്തെച്ചൊല്ലി നിയമസഭയിൽ ആരോഗ്യമന്ത്രി കെ. മുരളീധരനും പ്രതിപക്ഷ നേതാവ് പിണറായി വിജയനും തമ്മിൽ രൂക്ഷമായ വാക്പോര്. സംസ്ഥാനത്ത് മരുന്ന് ക്ഷാമമില്ലെന്നും ചില മരുന്നുകൾക്ക് മാത്രമാണ് കുറവുള്ളതെന്നുമുള്ള മന്ത്രിയുടെ വാദത്തെ പരിഹസിച്ച പിണറായി, “ആ കുറവ് തന്നെയാണ് ക്ഷാമമെന്ന് മന്ത്രി മനസ്സിലാക്കണം” എന്ന് തിരിച്ചടിച്ചു.
ആരോഗ്യരംഗത്തെ പ്രശ്നങ്ങൾ പരിഹരിക്കാൻ സർക്കാരിന്റെ കൈവശം അലാവുദ്ദീന്റെ അത്ഭുതവിളക്കില്ലെന്ന മന്ത്രിയുടെ പരാമർശത്തിനും പിണറായി മറുപടി നൽകി. “കേരളത്തിന്റെ ആരോഗ്യരംഗം രാജ്യത്തിന്റെ തന്നെ പ്രകാശഗോപുരമാണ്. ആ വിളക്ക് കെടുത്താതിരുന്നാൽ മാത്രം മതി, വേറെ അത്ഭുതവിളക്കൊന്നും തേടിപ്പോകേണ്ട കാര്യമില്ല,” എന്നായിരുന്നു അദ്ദേഹത്തിന്റെ പ്രതികരണം.
സർക്കാരിന്റെ പിടിപ്പുകേടാണ് പ്രതിസന്ധിക്ക് കാരണമെന്നും മരുന്നുകൾക്കായി ജനങ്ങൾ മണിക്കൂറുകളോളം ക്യൂ നിൽക്കുന്ന ദൃശ്യങ്ങൾ പുറത്തുവരുന്നുണ്ടെന്നും പിണറായി ആരോപിച്ചു. അട്ടപ്പാടിയിൽ ഉൾപ്പെടെ ശിശുമരണങ്ങൾ റിപ്പോർട്ട് ചെയ്യപ്പെടുന്ന സാഹചര്യത്തിൽ ഇതിന്റെ ഉത്തരവാദിത്വം സർക്കാർ പരിശോധിക്കണമെന്നും അദ്ദേഹം ആവശ്യപ്പെട്ടു.
ആരോഗ്യമേഖലയിലെ പ്രതിസന്ധിയും മരുന്ന് ക്ഷാമവും ചൂണ്ടിക്കാട്ടി പ്രതിപക്ഷം നൽകിയ അടിയന്തര പ്രമേയ നോട്ടീസിനിടെയാണ് നിയമസഭയിൽ വാക്പോര് നടന്നത്. ജീവൻരക്ഷാ മരുന്നുകൾ ഉൾപ്പെടെ ലഭ്യമല്ലെന്ന് കെ.വി. സുമേഷ് എംഎൽഎ സഭയിൽ ചൂണ്ടിക്കാട്ടിയിരുന്നു.
എന്നാൽ, അധികാരം നഷ്ടപ്പെട്ടതിന്റെ സങ്കടത്തിനുള്ള മരുന്നൊഴികെ മറ്റെല്ലാ മരുന്നുകളും സ്റ്റോക്കുണ്ടെന്ന പരിഹാസത്തോടെയായിരുന്നു ആരോഗ്യമന്ത്രി കെ. മുരളീധരന്റെ മറുപടി. മുൻ സർക്കാരിന്റെ കാലത്ത് പർച്ചേസ് ഓർഡറുകൾ നൽകാതിരുന്നതാണ് ഇപ്പോഴത്തെ പ്രതിസന്ധിക്ക് കാരണമെന്നും മന്ത്രി ആരോപിച്ചു.
മരുന്ന് ലഭ്യതയെക്കുറിച്ചുള്ള ഭരണപക്ഷത്തിന്റെ വിശദീകരണവും പ്രതിപക്ഷത്തിന്റെ വിമർശനവും സഭയിൽ ഏറ്റുമുട്ടിയതോടെ ആരോഗ്യരംഗത്തെ പ്രതിസന്ധി വീണ്ടും രാഷ്ട്രീയ ചർച്ചയുടെ കേന്ദ്രമായി.
