ഹൈദരാബാദിലെ നിസാംസ് ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസ് (നിംസ്) ഡെപ്യൂട്ടി സൂപ്രണ്ട് ഡോ. നോറി ലക്ഷ്മി ഭാസ്കറുമായി ബന്ധപ്പെട്ട സ്ഥലങ്ങളിൽ അഴിമതി വിരുദ്ധ ബ്യൂറോ (എസിബി) നടത്തിയ പരിശോധനയിൽ വൻതോതിൽ സ്വത്തുക്കൾ കണ്ടെത്തിയതായി റിപ്പോർട്ട്. ചൊവ്വാഴ്ച വസതിയിലും ഓഫീസിലും ഉൾപ്പെടെ ഒമ്പത് സ്ഥലങ്ങളിലാണ് എസിബി ഉദ്യോഗസ്ഥർ ഒരേസമയം പരിശോധന നടത്തിയത്.
പ്രാഥമിക പരിശോധനയിൽ 80 കോടിയിലധികം രൂപയുടെ സ്ഥാവര-ജംഗമ സ്വത്തുക്കൾ കണ്ടെത്തിയതായാണ് എസിബി ഉദ്യോഗസ്ഥർ വ്യക്തമാക്കുന്നത്. കുക്കാട്ട്പള്ളിയിൽ രണ്ട് ആഡംബര ഫ്ലാറ്റുകളും മണികൊണ്ട, പെറ്റ് ബഷീറാബാദ് മേഖലകളിലായി അഞ്ച് ഫ്ലാറ്റുകളും പരിശോധനയിൽ കണ്ടെത്തിയതായി റിപ്പോർട്ടുണ്ട്.
യാദാദ്രി, നന്ദിഗമ, ഷാമിർപേട്ട് എന്നിവിടങ്ങളിലായി നാല് തുറന്ന പ്ലോട്ടുകളും വിശാഖപട്ടണത്ത് 800 യാർഡ് ഭൂമിയും കണ്ടെത്തിയതായി ഉദ്യോഗസ്ഥർ അറിയിച്ചു. വിവിധ ബാങ്ക് അക്കൗണ്ടുകളിലായി 41 ലക്ഷം രൂപയും പോസ്റ്റ് ഓഫീസ് അക്കൗണ്ടുകളിൽ 12 ലക്ഷം രൂപയുടെ നിക്ഷേപവും ഒരു സ്വകാര്യ കമ്പനിയിൽ 35 ലക്ഷം രൂപയുടെ നിക്ഷേപവും കണ്ടെത്തിയതായി എസിബി അറിയിച്ചു.
ഇതിന് പുറമെ 517 ഗ്രാം സ്വർണം, മൂന്ന് കാറുകൾ, നാല് ഇരുചക്ര വാഹനങ്ങൾ എന്നിവയും പരിശോധനയിൽ കണ്ടെത്തിയതായി റിപ്പോർട്ടുണ്ട്. കണ്ടെത്തിയ സ്വത്തുക്കളുടെ യഥാർഥ വിപണി മൂല്യവും നിയമാനുസൃത വരുമാനവുമായി ഇവയ്ക്ക് പൊരുത്തമുണ്ടോയെന്നും പരിശോധിച്ചുവരികയാണ്.
കഴിഞ്ഞ 20 വർഷമായി നിംസിൽ ജോലി ചെയ്യുന്ന ഡോ. ലക്ഷ്മി ഭാസ്കർ കഴിഞ്ഞ അഞ്ച് വർഷമായി ഡെപ്യൂട്ടി സൂപ്രണ്ട് പദവിയിൽ തുടരുകയാണ്. അദ്ദേഹത്തിനെതിരെ നേരത്തെയും വിവിധ ആരോപണങ്ങൾ ഉയർന്നിരുന്നുവെന്നാണ് റിപ്പോർട്ട്.
പരിശോധനയിൽ കണ്ടെത്തിയ എല്ലാ സ്വത്തുക്കളുടെയും രേഖകളും സാമ്പത്തിക ഇടപാടുകളും വിശദമായി പരിശോധിച്ച് ആസ്തികളുടെ അന്തിമ മൂല്യം നിർണയിക്കുന്ന നടപടികളിലാണ് എസിബി ഉദ്യോഗസ്ഥർ.
