തിരഞ്ഞെടുപ്പ് കമ്മീഷന്റെ പ്രവർത്തനവുമായി ബന്ധപ്പെട്ട് രാഷ്ട്രീയ വിവാദം ശക്തമായിരിക്കെ, മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിന് പിന്തുണയുമായി പശ്ചിമ ബംഗാൾ ബിജെപി അധ്യക്ഷൻ സമീക് ഭട്ടാചാര്യ. പശ്ചിമ ബംഗാളിൽ സമാധാനപരമായ നിയമസഭാ തിരഞ്ഞെടുപ്പ് നടത്തുന്നതിൽ ഗ്യാനേഷ് കുമാർ നിർണായക പങ്കുവഹിച്ചെന്നും അദ്ദേഹത്തിന് കുറഞ്ഞത് പത്മഭൂഷൺ എങ്കിലും നൽകണമെന്നും ഭട്ടാചാര്യ പറഞ്ഞു.
വോട്ടർമാർക്ക് ഭയമോ ഭീഷണിയോ കൂടാതെ വോട്ട് ചെയ്യാൻ സാധിച്ചുവെന്നും തിരഞ്ഞെടുപ്പിനിടെ കൊലപാതക സംഭവങ്ങൾ ഉണ്ടായില്ലെന്നും ഭട്ടാചാര്യ അവകാശപ്പെട്ടു. പശ്ചിമ ബംഗാളിൽ ഇത്തരമൊരു തിരഞ്ഞെടുപ്പ് അപൂർവമാണെന്നും അദ്ദേഹം പറഞ്ഞു. വോട്ടർപട്ടികയുടെ പ്രത്യേക തീവ്ര പുനഃപരിശോധനയായ എസ്ഐആറിലൂടെ അനധികൃതമായി താമസിക്കുന്നവരെന്ന് ബിജെപി ആരോപിക്കുന്ന ബംഗ്ലാദേശി നുഴഞ്ഞുകയറ്റക്കാരുടെ പേരുകൾ നീക്കം ചെയ്യുന്നതിലും ഗ്യാനേഷ് കുമാർ പ്രധാന പങ്കുവഹിച്ചെന്ന് ഭട്ടാചാര്യ അവകാശപ്പെട്ടു.
അതേസമയം, എസ്ഐആർ നടപടികളുമായി ബന്ധപ്പെട്ട് തിരഞ്ഞെടുപ്പ് കമ്മീഷനുള്ളിലെ അഭിപ്രായവ്യത്യാസങ്ങൾ പുറത്തുവന്നതിനു പിന്നാലെയാണ് ഭട്ടാചാര്യയുടെ പ്രതികരണം. തിരഞ്ഞെടുപ്പ് കമ്മീഷണർമാരായ സുഖ്ബീർ സിങ് സന്ധുവും വിവേക് ജോഷിയും എസ്ഐആറുമായി ബന്ധപ്പെട്ട ചില തീരുമാനങ്ങളിൽ എതിർപ്പ് രേഖപ്പെടുത്തിയതായി ‘ദി ഇന്ത്യൻ എക്സ്പ്രസ്’ റിപ്പോർട്ട് ചെയ്തിരുന്നു. ഇതിന്റെ പശ്ചാത്തലത്തിൽ ഗ്യാനേഷ് കുമാറിനെതിരെ പ്രതിപക്ഷ പാർട്ടികൾ വിമർശനം ശക്തമാക്കുകയും അദ്ദേഹത്തെ സ്ഥാനത്തുനിന്ന് നീക്കണമെന്ന ആവശ്യം ഉയർത്തുകയും ചെയ്തിട്ടുണ്ട്.
മുഖ്യ തിരഞ്ഞെടുപ്പ് കമ്മീഷണർക്കെതിരെ അന്വേഷണം വേണമെന്ന പ്രതിപക്ഷ നേതാവ് രാഹുൽ ഗാന്ധിയുടെ ആവശ്യത്തെയും ഭട്ടാചാര്യ തള്ളി. തിരഞ്ഞെടുപ്പ് കമ്മീഷന്റെ പ്രവർത്തനത്തെക്കുറിച്ചുള്ള പ്രതിപക്ഷ വിമർശനങ്ങൾക്കിടയിലും ഗ്യാനേഷ് കുമാറിനെ പിന്തുണയ്ക്കുന്ന നിലപാടാണ് ബംഗാൾ ബിജെപി അധ്യക്ഷൻ സ്വീകരിച്ചത്.
പശ്ചിമ ബംഗാളിൽ നടന്ന നിയമസഭാ തിരഞ്ഞെടുപ്പിന്റെ നടത്തിപ്പിനെയും വോട്ടർപട്ടിക പരിഷ്കരണ നടപടികളെയും ചൂണ്ടിക്കാട്ടിയാണ് ഗ്യാനേഷ് കുമാറിന് പത്മഭൂഷൺ നൽകണമെന്ന ആവശ്യം ഭട്ടാചാര്യ ഉന്നയിച്ചത്.
