ഗസയിലേക്ക് അടിയന്തര സഹായം അനുവദിക്കണം; ഇസ്രയേലിനോട് ആവശ്യപ്പെട്ട് ബ്രിട്ടൻ ഉൾപ്പെടെ നാല് രാജ്യങ്ങൾ

ഗസയിൽ കടുത്ത മാനുഷിക പ്രതിസന്ധി തുടരുന്ന സാഹചര്യത്തിൽ അടിയന്തര സഹായങ്ങൾ അനുവദിക്കണമെന്ന് ഇസ്രയേലിനോട് ആവശ്യപ്പെട്ട് ഓസ്‌ട്രേലിയ, കാനഡ, ഇറ്റലി, ബ്രിട്ടൻ എന്നീ രാജ്യങ്ങൾ. ടെന്റുകളും മറ്റ് അവശ്യസാധനങ്ങളും ഗസയിലേക്ക് എത്തിക്കുന്നത് ഇസ്രയേൽ തടയുകയാണെന്ന് രാജ്യങ്ങൾ ആരോപിച്ചു. ഗസയിലെ ജനങ്ങൾക്ക് ആവശ്യമായ മാനുഷിക സഹായം അടിയന്തരമായും തടസമില്ലാതെയും ലഭ്യമാക്കണമെന്നും ആവശ്യപ്പെട്ടു.

ഗസയിലെ മാനുഷിക സാഹചര്യം വിലയിരുത്തി തയ്യാറാക്കിയ സംയുക്ത പ്രസ്താവനയിൽ നാല് രാജ്യങ്ങളിലെയും വിദേശകാര്യ മന്ത്രിമാർ ഞായറാഴ്ച ഒപ്പുവച്ചു. ഏകദേശം 1.5 ലക്ഷം ടെന്റുകളും മറ്റ് അവശ്യസാധനങ്ങളും ഇസ്രയേൽ അതിർത്തിയിൽ തടഞ്ഞുവച്ചിരിക്കുകയാണെന്ന് പ്രസ്താവനയിൽ ചൂണ്ടിക്കാട്ടി. ഗസയിലേക്കുള്ള സാധനങ്ങളുടെ പ്രവേശനം ഇസ്രയേൽ വർഷങ്ങളായി നിയന്ത്രിക്കുന്നതായും രാജ്യങ്ങൾ ആരോപിച്ചു.

നവംബർ ആറിന് ഗസയിലുണ്ടായ കനത്ത മഴയും വെള്ളപ്പൊക്കവും ഫലസ്തീനികളുടെ ദുരിതം വർധിപ്പിച്ചതായി പ്രസ്താവനയിൽ പറയുന്നു. വെള്ളപ്പൊക്കത്തിൽ പതിനായിരക്കണക്കിന് ആളുകൾക്ക് വീടുകളും അഭയകേന്ദ്രങ്ങളും നഷ്ടപ്പെട്ടതായും ശൈത്യകാലം ആരംഭിക്കുന്നതിന് മുമ്പ് ഇവർക്ക് ആവശ്യമായ സഹായം എത്തിക്കണമെന്നും രാജ്യങ്ങൾ ആവശ്യപ്പെട്ടു.

നവംബർ ആറിന് പെയ്ത കനത്ത മഴയിൽ ഗസയിൽ വ്യാപക നാശനഷ്ടങ്ങളുണ്ടായതായി ഗസ ആരോഗ്യ മന്ത്രാലയം അറിയിച്ചു. ഏകദേശം മൂന്നര ലക്ഷം പേർക്ക് അഭയകേന്ദ്രങ്ങൾ നഷ്ടപ്പെട്ടതായും ടെന്റുകളില്ലാത്തതിനാൽ നിരവധി പേർ തുറസ്സായ സ്ഥലങ്ങളിൽ കഴിയുകയാണെന്നും മന്ത്രാലയം വ്യക്തമാക്കി.

ശൈത്യകാലം ആരംഭിക്കുന്നതിന് മുമ്പ് ദുരിതബാധിതർക്ക് ആവശ്യമായ ടെന്റുകളും മറ്റ് സഹായങ്ങളും എത്തിക്കാൻ ഇനിയും സമയമുണ്ടെന്നും നാല് രാജ്യങ്ങളുടെ സംയുക്ത പ്രസ്താവനയിൽ വ്യക്തമാക്കി.

മറുപടി രേഖപ്പെടുത്തുക