കണ്ണൂരിൽ കിഫ്ബി നടത്തിയ ഭൂമി ഏറ്റെടുക്കലുമായി ബന്ധപ്പെട്ട് വിജിലൻസ് അന്വേഷണത്തിന് സർക്കാർ ഉത്തരവിട്ടു. ഭൂമി ഏറ്റെടുക്കൽ നടപടികളിൽ ചട്ടങ്ങൾ പാലിച്ചിരുന്നോ, ഭൂമിയുടെ മൂല്യനിർണയത്തിൽ ക്രമക്കേട് നടന്നിട്ടുണ്ടോ, റിയൽ എസ്റ്റേറ്റ് താൽപര്യങ്ങൾ ഇടപാടുകൾക്ക് പിന്നിലുണ്ടായിരുന്നോ തുടങ്ങിയ കാര്യങ്ങളാണ് അന്വേഷണ പരിധിയിൽ വരുന്നത്. 4,896 ഏക്കർ ഭൂമി 12,240 കോടി രൂപ ചെലവഴിച്ച് ഏറ്റെടുത്തതുമായി ബന്ധപ്പെട്ടാണ് അന്വേഷണം.
കണ്ണൂരിൽ വൻതോതിൽ ഭൂമി ഏറ്റെടുത്തതുമായി ബന്ധപ്പെട്ട് നേരത്തെ നിരവധി ആരോപണങ്ങൾ ഉയർന്നിരുന്നു. ഏകദേശം 1,000 ഏക്കർ ഭൂമി വാങ്ങിയതിലും പിന്നീട് 4,000 ഏക്കർ കൂടി ഏറ്റെടുക്കാൻ ശ്രമിച്ചതിലും ക്രമക്കേടുകൾ നടന്നിട്ടുണ്ടെന്ന് മുഖ്യമന്ത്രി വി.ഡി. സതീശൻ ആരോപിച്ചിരുന്നു. കിഫ്ബിയുടെ ഭൂമി ഏറ്റെടുക്കലിൽ വൻ ക്രമക്കേടുകളുണ്ടെന്നും കിഫ്ബി വായ്പകൾക്ക് സർക്കാർ ഗ്യാരണ്ടി ആവശ്യമില്ലെന്ന ധനവകുപ്പിന്റെ നിർദേശം മറികടന്നത് റൂൾസ് ഓഫ് ബിസിനസ് ലംഘനമാണെന്നും അദ്ദേഹം ചൂണ്ടിക്കാട്ടിയിരുന്നു.
മുൻ ഉദ്യോഗസ്ഥ സുധാ പിള്ളയുടെ നേതൃത്വത്തിലുള്ള വിദഗ്ധ സമിതിയുടെ ശുപാർശയുടെ അടിസ്ഥാനത്തിലാണ് വിജിലൻസ് അന്വേഷണം പ്രഖ്യാപിച്ചത്. വ്യവസായ മേഖല സ്ഥാപിക്കുന്നതിനായി കണ്ണൂർ പട്ടാനൂർ പണയത്തുപറമ്പിൽ 1,000 ഏക്കർ ഭൂമി ഏറ്റെടുക്കുമെന്ന 2016-17ലെ ബജറ്റ് പ്രഖ്യാപനത്തിന്റെ മറവിലാണ് ഇടപാടുകൾ നടന്നതെന്നാണ് ആരോപണം.
