പിഎം ശ്രീ പദ്ധതിയുമായി തൽക്കാലം മുന്നോട്ടുപോകേണ്ടതില്ലെന്ന നിലപാടിലേക്ക് വിദ്യാഭ്യാസ വകുപ്പ്. പദ്ധതിക്കെതിരെ മുസ്ലിം ലീഗ് ഉൾപ്പെടെ യുഡിഎഫിലെ ഘടകകക്ഷികളിൽനിന്ന് എതിർപ്പ് ശക്തമായ സാഹചര്യത്തിലാണ് സർക്കാർ നടപടികൾ തൽക്കാലം നിർത്തിവെക്കാൻ തീരുമാനിച്ചതെന്നാണ് വിവരം.
പിഎം ശ്രീയുമായി ബന്ധപ്പെട്ട് രൂപീകരിച്ച ഉപസമിതി ഉടൻ യോഗം ചേരില്ല. വിഷയത്തിൽ വിദ്യാഭ്യാസ മന്ത്രി മുഖ്യമന്ത്രിയുമായി ചർച്ച നടത്തിയതായാണ് റിപ്പോർട്ട്. പദ്ധതിയുടെ നടത്തിപ്പിനെതിരെ യൂത്ത് ലീഗ് ഉൾപ്പെടെയുള്ള സംഘടനകൾ നേരത്തെ ശക്തമായ വിമർശനം ഉന്നയിച്ചിരുന്നു.
അതേസമയം, പിഎം ശ്രീ പദ്ധതിയുമായി മുന്നോട്ടുപോകണമെന്ന് ആവശ്യപ്പെട്ട് കേന്ദ്ര സർക്കാർ സംസ്ഥാനത്തിന് കത്തയച്ചിരുന്നു. കേന്ദ്ര വിദ്യാഭ്യാസ സെക്രട്ടറി ചീഫ് സെക്രട്ടറിക്കാണ് കത്തയച്ചത്. പദ്ധതിയിൽ തുടരണമെന്നും ഗുണനിലവാരമുള്ള വിദ്യാഭ്യാസം ഉറപ്പാക്കാൻ നടപടികൾ വേഗത്തിലാക്കണമെന്നും കത്തിൽ ആവശ്യപ്പെട്ടിരുന്നു.
കേരളം ഇതിനകം പദ്ധതിയുമായി ബന്ധപ്പെട്ട ധാരണാപത്രത്തിൽ ഒപ്പുവെച്ചിട്ടുണ്ടെന്നും കത്തിൽ കേന്ദ്രം ചൂണ്ടിക്കാട്ടിയിരുന്നു. പിഎം ശ്രീയുമായി ബന്ധപ്പെട്ട ഉപസമിതിയുടെ നടപടികൾ വേഗത്തിലാക്കണമെന്നും വിദ്യാർഥികളുടെ താൽപര്യം സംരക്ഷിക്കണമെന്നും കേന്ദ്രം ആവശ്യപ്പെട്ടിരുന്നു.
നിലവിലെ സർക്കാരിന്റെ കാലത്ത് കേന്ദ്രം അയക്കുന്ന രണ്ടാമത്തെ കത്താണിത്. എന്നാൽ സംസ്ഥാനത്ത് ഉയർന്ന രാഷ്ട്രീയ എതിർപ്പ് കണക്കിലെടുത്ത് പിഎം ശ്രീ പദ്ധതിയുടെ തുടർനടപടികൾ തൽക്കാലം മുന്നോട്ടുകൊണ്ടുപോകേണ്ടതില്ലെന്ന നിലപാടിലാണ് സർക്കാർ എന്നാണ് ലഭിക്കുന്ന വിവരം.
പദ്ധതിയുടെ തുടർനടപടികൾ സംബന്ധിച്ച് മുഖ്യമന്ത്രിയും വിദ്യാഭ്യാസ മന്ത്രിയും വീണ്ടും ചർച്ച നടത്തിയേക്കും. ഘടകകക്ഷികളുടെ നിലപാട് കൂടി പരിഗണിച്ച ശേഷമായിരിക്കും സർക്കാർ അന്തിമ തീരുമാനം സ്വീകരിക്കുക.
