പശ്ചിമേഷ്യയിലെ സംഘർഷത്തെ തുടർന്ന് ക്രൂഡ് ഓയിൽ വില കുതിച്ചുയർന്നതോടെ ഇന്ത്യയിലെ പൊതുമേഖലാ എണ്ണക്കമ്പനികൾ കടുത്ത സാമ്പത്തിക സമ്മർദത്തിൽ. ഇന്ത്യൻ ഓയിൽ കോർപ്പറേഷൻ (ഐഒസി), ഭാരത് പെട്രോളിയം കോർപ്പറേഷൻ (ബിപിസിഎൽ), ഹിന്ദുസ്ഥാൻ പെട്രോളിയം കോർപ്പറേഷൻ (എച്ച്പിസിഎൽ) എന്നിവയ്ക്ക് പെട്രോൾ, ഡീസൽ, എൽപിജി വിൽപ്പനയിൽ പ്രതിദിനം ഏകദേശം 530 കോടി രൂപയുടെ നഷ്ടമുണ്ടാകുന്നതായാണ് റേറ്റിംഗ് ഏജൻസിയായ ഐസിആർഎയുടെ വിലയിരുത്തൽ.
നിലവിലെ കണക്കുകൾ പ്രകാരം പെട്രോൾ വിൽപ്പനയിൽ ലിറ്ററിന് ഏകദേശം 8 രൂപയും ഡീസൽ വിൽപ്പനയിൽ ലിറ്ററിന് 9 രൂപയും കമ്പനികൾക്ക് നഷ്ടമാകുന്നു. ഗാർഹിക എൽപിജി സിലിണ്ടറിന് ഏകദേശം 300 രൂപയുടെ അണ്ടർ-റിക്കവറിയും നേരിടുന്നുണ്ട്. അന്താരാഷ്ട്ര വിപണിയിൽ ക്രൂഡ് വില ഉയർന്നിട്ടും ആഭ്യന്തര ഇന്ധനവിലയിൽ അതനുസരിച്ചുള്ള വർധന വരാത്തതാണ് കമ്പനികളുടെ വിപണന മാർജിനുകളെ ബാധിക്കുന്നത്.
പശ്ചിമേഷ്യയിലെ സംഘർഷം, എണ്ണ വിതരണപാതകളിലെ തടസ്സസാധ്യതകൾ തുടങ്ങിയവയാണ് ക്രൂഡ് വില ഉയരാൻ പ്രധാന കാരണങ്ങളെന്ന് ഐസിആർഎ ചൂണ്ടിക്കാട്ടുന്നു. സംഘർഷം നീണ്ടുനിൽക്കുകയും ആഭ്യന്തര ഇന്ധനവിലയിൽ മാറ്റമുണ്ടാകാതിരിക്കുകയും ചെയ്താൽ എണ്ണക്കമ്പനികളുടെ ലാഭക്ഷമതയിലും പണമൊഴുക്കിലും വലിയ സമ്മർദമുണ്ടാകുമെന്നും റിപ്പോർട്ട് മുന്നറിയിപ്പ് നൽകുന്നു.
ഇന്ത്യയുടെ ക്രൂഡ് ഓയിൽ ആവശ്യത്തിന്റെ 88 ശതമാനത്തിലധികവും ഇറക്കുമതിയിലൂടെയാണ് നിറവേറ്റുന്നത്. അതിനാൽ അന്താരാഷ്ട്ര ക്രൂഡ് വിലയിലെ വർധന ആഭ്യന്തര എണ്ണവിപണന കമ്പനികളുടെ ചെലവിൽ നേരിട്ട് പ്രതിഫലിക്കും. അതേസമയം, റിഫൈനിംഗ് മേഖലയിൽ താരതമ്യേന മെച്ചപ്പെട്ട മാർജിൻ ലഭിക്കുന്നുണ്ടെങ്കിലും, കമ്പനികൾ റിഫൈനറികളിൽ ഉൽപ്പാദിപ്പിക്കുന്നതിലധികം ഇന്ധനം വിപണിയിൽ വിൽക്കുന്നതിനാൽ റിഫൈനിംഗ് ലാഭം മാത്രം വിപണന നഷ്ടം പൂർണമായി നികത്താൻ പര്യാപ്തമല്ല.
ക്രൂഡ് വില ഉയർന്ന നിലയിൽ തുടരുകയും പെട്രോൾ, ഡീസൽ വിലയിൽ മാറ്റമില്ലാതിരിക്കുകയും ചെയ്താൽ വരും മാസങ്ങളിൽ കമ്പനികളുടെ സാമ്പത്തിക സമ്മർദം കൂടുതൽ രൂക്ഷമാകാമെന്നാണ് ഐസിആർഎയുടെ വിലയിരുത്തൽ. ഉയർന്ന ക്രൂഡ് വിലയും ആഭ്യന്തര ഇന്ധനവിലയിലെ നിശ്ചലതയും കമ്പനികളുടെ ഹ്രസ്വകാല കടബാധ്യതയും വർധിപ്പിക്കാനിടയുണ്ടെന്നും ഐസിആർഎ ചൂണ്ടിക്കാട്ടുന്നു.
