യെമനിലെ ഹൂത്തികളുടെ മിസൈൽ, ഡ്രോൺ ആക്രമണങ്ങൾ ശക്തമാകുന്ന സാഹചര്യത്തിൽ സൗദി അറേബ്യയിലെ പ്രധാന എണ്ണകേന്ദ്രമായ യാൻബുവിന്റെ സുരക്ഷ ശക്തമാക്കാൻ സൈനികരെ വിന്യസിക്കുമെന്ന് ഫ്രഞ്ച് പ്രസിഡന്റ് ഇമ്മാനുവൽ മാക്രോൺ. സൈനികർക്ക് പുറമെ റഡാർ സംവിധാനങ്ങളും വ്യോമപ്രതിരോധ സംവിധാനങ്ങളും സൗദിയിലേക്ക് അയക്കുമെന്ന് മാക്രോൺ അറിയിച്ചു. യാൻബു എണ്ണകേന്ദ്രത്തിന്റെ സംരക്ഷണം മാത്രമായിരിക്കും ഫ്രഞ്ച് സൈന്യത്തിന്റെ ദൗത്യമെന്നും സംഘർഷത്തിൽ നേരിട്ട് പങ്കെടുക്കില്ലെന്നും അദ്ദേഹം വ്യക്തമാക്കി.
സൗദി അറേബ്യയുടെ അനുമതിയോടെയാണ് വിന്യാസമെന്ന് മാക്രോൺ പറഞ്ഞു. ചെങ്കടലിലെ പ്രധാന എണ്ണ കയറ്റുമതി കേന്ദ്രമായ യാൻബുവിന് സമീപം ഹൂത്തികളുടെ ആക്രമണ ഭീഷണി വർധിച്ചതോടെയാണ് ഫ്രാൻസിന്റെ ഇടപെടൽ. സൗദി നേതൃത്വത്തിലുള്ള സഖ്യസേന യാൻബുവിലേക്കും തായിഫിലേക്കും ലക്ഷ്യമിട്ട് എത്തിയ ആറ് ബാലിസ്റ്റിക് മിസൈലുകൾ തടഞ്ഞതായി നേരത്തെ അറിയിച്ചിരുന്നു. യാൻബു മേഖലയിൽ ഒരു ബാലിസ്റ്റിക് മിസൈലും ഡ്രോണും വ്യോമപ്രതിരോധ സംവിധാനം ഉപയോഗിച്ച് തകർത്തതായും റിപ്പോർട്ടുകളുണ്ട്.
സൗദി അറേബ്യയിലെ നിരവധി തന്ത്രപ്രധാന കേന്ദ്രങ്ങൾ ലക്ഷ്യമിട്ട് മിസൈൽ, ഡ്രോൺ ആക്രമണങ്ങൾ നടത്തിയതായി ഹൂത്തികൾ അവകാശപ്പെട്ടിട്ടുണ്ട്. യാൻബുവിലെ സൗദി അരാംകോയുടെ അടിസ്ഥാനസൗകര്യങ്ങളും ആക്രമണ ലക്ഷ്യങ്ങളിലുണ്ടായിരുന്നുവെന്നാണ് ഹൂത്തികളുടെ അവകാശവാദം. എന്നാൽ ആക്രമണവുമായി ബന്ധപ്പെട്ട ഹൂത്തി അവകാശവാദങ്ങളിലെ എല്ലാ വിശദാംശങ്ങളും സ്വതന്ത്രമായി സ്ഥിരീകരിക്കപ്പെട്ടിട്ടില്ല.
ചെങ്കടൽ തീരത്തെ യാൻബു സൗദി അറേബ്യയുടെ പ്രധാന എണ്ണ ശുദ്ധീകരണ-കയറ്റുമതി കേന്ദ്രങ്ങളിലൊന്നാണ്. ഹോർമുസ് കടലിടുക്ക് വഴിയുള്ള എണ്ണ ഗതാഗതത്തിന് നിയന്ത്രണങ്ങൾ നേരിടുന്ന സാഹചര്യത്തിൽ സൗദിയുടെ എണ്ണ കയറ്റുമതിക്ക് യാൻബു വഴി കൂടുതൽ പ്രാധാന്യം ലഭിച്ചിട്ടുണ്ട്. അതിനാൽ മേഖലയിലെ എണ്ണ അടിസ്ഥാനസൗകര്യങ്ങൾക്ക് നേരെയുള്ള ആക്രമണങ്ങൾ ആഗോള ഊർജവിതരണത്തിലും ആശങ്ക ഉയർത്തുന്നുണ്ട്.
സൗദി അറേബ്യയ്ക്ക് സൈനിക പിന്തുണ നൽകുന്നതുമായി ബന്ധപ്പെട്ട് ഫ്രാൻസിന്റെ നീക്കം ഏറ്റവും പുതിയ അന്താരാഷ്ട്ര ഇടപെടലാണ്. നേരത്തെ ബ്രിട്ടനും സൗദിയുടെ വ്യോമപ്രതിരോധ ശേഷി ശക്തിപ്പെടുത്തുന്നതിനുള്ള സഹായം പ്രഖ്യാപിച്ചിരുന്നു. അതേസമയം, ഹൂത്തികൾക്കെതിരായ നേരിട്ടുള്ള സൈനിക നടപടി ആവശ്യപ്പെട്ട സൗദിയുടെ അഭ്യർഥന അമേരിക്കൻ പ്രസിഡന്റ് ഡൊണാൾഡ് ട്രംപ് നിരസിച്ചതായി റിപ്പോർട്ടുകളുണ്ട്.
