സൂപ്പർസ്റ്റാർ രജനീകാന്തിന്റെ ബോക്‌സ് ഓഫീസ് കരുത്ത് വീണ്ടും ചർച്ചയാകുന്നു. നെൽസൺ ദിലീപ്കുമാർ സംവിധാനം ചെയ്ത ‘ജയിലർ 2’ റിലീസിന്റെ ആദ്യദിനം ആഗോളതലത്തിൽ 125.25 കോടി രൂപ നേടിയെന്നാണ് ട്രേഡ് റിപ്പോർട്ടുകൾ. തമിഴ് സിനിമയിലെ ഏറ്റവും വലിയ ഓപ്പണിംഗുകളിലൊന്നായി ചിത്രം മാറിയെന്നും റിപ്പോർട്ടുകൾ വ്യക്തമാക്കുന്നു.
ട്രേഡ് ട്രാക്കറായ സാക്നിൽക്കിന്റെ പ്രാഥമിക കണക്കുകൾ പ്രകാരം, ചിത്രം ഇന്ത്യയിൽ നിന്ന് 70.25 കോടി രൂപ ഗ്രോസ് കളക്ഷൻ നേടി. ഇതിൽ 59.70 കോടി രൂപയാണ് നെറ്റ് കളക്ഷൻ. രാജ്യത്തുടനീളം ഏകദേശം 16,599 ഷോകളിൽ പ്രദർശിപ്പിച്ച ചിത്രത്തിന് ശരാശരി 55.4 ശതമാനം ഒക്യുപൻസിയും ലഭിച്ചതായാണ് കണക്ക്.
വിദേശ വിപണികളിലും ചിത്രത്തിന് മികച്ച പ്രതികരണം ലഭിച്ചതായാണ് റിപ്പോർട്ടുകൾ. ആദ്യദിനം വിദേശത്തുനിന്ന് 55 കോടി രൂപ ഗ്രോസ് കളക്ഷൻ നേടിയതോടെ ആഗോള ബോക്‌സ് ഓഫീസിൽ ശക്തമായ തുടക്കമാണ് ചിത്രം കുറിച്ചത്.
തമിഴ്‌നാട്ടിൽ വൻ മുന്നേറ്റം
ഭാഷാടിസ്ഥാനത്തിലുള്ള കണക്കുകളിൽ തമിഴ് പതിപ്പാണ് മുന്നിൽ. തമിഴ്‌നാട്ടിൽ മാത്രം 9,326 ഷോകളിൽനിന്ന് 43.35 കോടി രൂപ കളക്ഷൻ നേടിയതായാണ് റിപ്പോർട്ട്. ഇവിടെ ചിത്രത്തിന്റെ ശരാശരി ഒക്യുപൻസി 70.8 ശതമാനമായിരുന്നു.
തെലുങ്ക് സംസ്ഥാനങ്ങളിലും ചിത്രത്തിന് മികച്ച സ്വീകാര്യത ലഭിച്ചു. തെലുങ്ക് പതിപ്പ് 12.50 കോടി രൂപയും ഹിന്ദി പതിപ്പ് 3.50 കോടി രൂപയും കന്നഡ പതിപ്പ് 35 ലക്ഷം രൂപയും നേടിയെന്നാണ് പ്രാഥമിക കണക്കുകൾ. തമിഴ്‌നാടിന് പിന്നാലെ കർണാടക, ആന്ധ്രാപ്രദേശ്–തെലങ്കാന, കേരളം എന്നിവിടങ്ങളിലാണ് ചിത്രത്തിന് മികച്ച കളക്ഷൻ ലഭിച്ചതെന്നാണ് റിപ്പോർട്ട്.
റെക്കോർഡ് ഓപ്പണിംഗുകളുടെ പട്ടികയിൽ
അടുത്തിടെ പുറത്തിറങ്ങിയ ‘കൂലി’, ‘ലിയോ’ എന്നീ ചിത്രങ്ങളുടെ ആഗോള ആദ്യദിന കളക്ഷനുമായി താരതമ്യം ചെയ്യുമ്പോൾ ‘ജയിലർ 2’ പിന്നിലാണെന്നാണ് ട്രേഡ് വൃത്തങ്ങളുടെ വിലയിരുത്തൽ. എങ്കിലും തമിഴ് സിനിമയിലെ ഏറ്റവും വലിയ ആദ്യദിന ഓപ്പണിംഗുകളിൽ മൂന്നാം സ്ഥാനത്തെത്താൻ ചിത്രത്തിന് കഴിഞ്ഞതായാണ് റിപ്പോർട്ടുകൾ.
അതേസമയം, പുറത്തുവന്ന കണക്കുകൾ പ്രാഥമികമാണെന്നും അന്തിമ കളക്ഷൻ കണക്കുകളിൽ മാറ്റമുണ്ടാകാമെന്നും ട്രേഡ് വിശകലന വിദഗ്ധർ ചൂണ്ടിക്കാട്ടുന്നു.
