രാഷ്ട്രീയത്തിൽ മത്സരം, വികസനത്തിൽ സഹകരണം; മോദിയുമായുള്ള ബന്ധത്തെക്കുറിച്ച് ഡി.കെ. ശിവകുമാർ

രാഷ്ട്രീയത്തിൽ എതിരാളികളാണെങ്കിലും സംസ്ഥാനത്തിന്റെ വികസനത്തിനായി കേന്ദ്രസർക്കാരുമായി സഹകരിച്ച് പ്രവർത്തിക്കുമെന്ന് കർണാടക ഉപമുഖ്യമന്ത്രി ഡി.കെ. ശിവകുമാർ. പ്രധാനമന്ത്രി നരേന്ദ്ര മോദിയുമായി നല്ല ബന്ധമുണ്ടെന്ന ചർച്ചകളോട് പ്രതികരിക്കുകയായിരുന്നു അദ്ദേഹം. രാഷ്ട്രീയവും വികസനവും രണ്ടായി കാണണമെന്നും “രാഷ്ട്രീയത്തിൽ മത്സരിക്കും, വികസനത്തിൽ സഹകരിക്കും” എന്നും ശിവകുമാർ വ്യക്തമാക്കി.

ബെംഗളൂരുവിൽ പിങ്ക് ലൈൻ മെട്രോ ഉൾപ്പെടെയുള്ള പദ്ധതികളുടെ ഉദ്ഘാടനച്ചടങ്ങിനിടെ മോദിയുമായി നടത്തിയ സൗഹൃദപരമായ ഇടപെടലുകൾ രാഷ്ട്രീയ ചർച്ചകൾക്ക് വഴിവെച്ചിരുന്നു. എന്നാൽ, സംസ്ഥാനത്തിന്റെ ആവശ്യങ്ങൾ പ്രധാനമന്ത്രിയുടെ ശ്രദ്ധയിൽപ്പെടുത്തുക മാത്രമാണ് താൻ ചെയ്തതെന്നും അദ്ദേഹം പറഞ്ഞു.

മേക്കേദാട്ടു പദ്ധതിക്ക് ആവശ്യമായ വനം, പരിസ്ഥിതി അനുമതികൾ ലഭ്യമാക്കണമെന്ന് മോദിയോട് ആവശ്യപ്പെട്ടതായി ശിവകുമാർ അറിയിച്ചു. കസ്തൂരിരംഗൻ റിപ്പോർട്ട് നിരസിക്കണമെന്നും മെട്രോ പദ്ധതികളിലെ തടസ്സങ്ങൾ പരിഹരിക്കാൻ സാങ്കേതിക സമിതി രൂപീകരിക്കണമെന്നും ആവശ്യപ്പെട്ടിട്ടുണ്ട്. മെട്രോ ചെലവിൽ കേന്ദ്രത്തിന്റെ തുല്യവിഹിതവും ബെംഗളൂരുവിൽ 500 കിലോമീറ്റർ മെട്രോ ശൃംഖല എന്ന ലക്ഷ്യത്തിലേക്കുള്ള നടപടികളും അദ്ദേഹം ഉന്നയിച്ചു.

നഗരത്തിലെ ഇരട്ടനില മേൽപ്പാലങ്ങളുടെ നിർമാണവും പ്രധാനമന്ത്രിയുമായി ചർച്ച ചെയ്തു. ബെംഗളൂരുവിൽ റോഡുകൾക്കായി നീക്കിവെക്കുന്ന ഭൂമിയുടെ വിഹിതം മറ്റ് പ്രദേശങ്ങളെ അപേക്ഷിച്ച് കുറവാണെന്നും ഭൂമി ഏറ്റെടുക്കലിന് വലിയ തുക നഷ്ടപരിഹാരം നൽകേണ്ടിവരുന്നുണ്ടെന്നും ശിവകുമാർ ചൂണ്ടിക്കാട്ടി. സംസ്ഥാനത്തിന്റെ ആവശ്യങ്ങൾ ഉന്നയിക്കാൻ സർവകക്ഷി സംഘവുമായി ഡൽഹിയിലേക്ക് പോകുമെന്നും അദ്ദേഹം പറഞ്ഞു.

ഫോൺ ചോർത്തൽ ആരോപണങ്ങളിൽ പൂർണ റിപ്പോർട്ട് ലഭിച്ചശേഷം പ്രതികരിക്കുമെന്നും ശിവകുമാർ വ്യക്തമാക്കി. കർഷകർക്ക് സൗജന്യ വൈദ്യുതി നൽകുന്നതുമായി ബന്ധപ്പെട്ട കുടിശ്ശിക 20,000 കോടി രൂപയിൽനിന്ന് 30,000 കോടി രൂപയായി ഉയർന്നതായും അദ്ദേഹം പറഞ്ഞു. വരൾച്ചയെ തുടർന്ന് ജലസംഭരണികൾ നിറയ്ക്കാൻ കർഷകർ കൂടുതൽ വൈദ്യുതി ഉപയോഗിക്കുന്നതാണ് വർധനയ്ക്ക് കാരണമെന്നും പ്രശ്നം പരിഹരിക്കാൻ നടപടിയെടുക്കുമെന്നും അദ്ദേഹം കൂട്ടിച്ചേർത്തു.

മറുപടി രേഖപ്പെടുത്തുക