മുംബൈയിലെ ശിവാജി പാർക്കിൽ മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് സംഘടിപ്പിച്ച സിജെപി പ്രതിഷേധവുമായി ബന്ധപ്പെട്ട് സംഘാടകർ ഉൾപ്പെടെ 500 ഓളം പേർക്കെതിരെ മുംബൈ പൊലീസ് കേസ് രജിസ്റ്റർ ചെയ്തു. ശിവാജി പാർക്ക് പൊലീസ് സ്റ്റേഷനിലാണ് കേസ് എടുത്തിരിക്കുന്നത്.
നിയമവിരുദ്ധ ഒത്തുചേരൽ, പൊലീസ് ഉത്തരവ് ലംഘിക്കൽ എന്നിവ ഉൾപ്പെടെയുള്ള കുറ്റങ്ങൾ ചുമത്തിയാണ് കേസ് രജിസ്റ്റർ ചെയ്തിരിക്കുന്നത്. പ്രതിഷേധം നടത്തുന്നതിനിടെ നിയമ-ക്രമ പ്രശ്നങ്ങൾ ഉണ്ടായെന്ന വിലയിരുത്തലിന്റെ അടിസ്ഥാനത്തിലാണ് നടപടി സ്വീകരിച്ചതെന്നാണ് റിപ്പോർട്ട്.
ഇതിനിടെ, സോഷ്യൽ മീഡിയ ഇൻഫ്ലുവൻസർ ഫൈസാൻ അൻസാരി സിജെപി സ്ഥാപകൻ അഭിജിത് ദീപ്കെയ്ക്കെതിരെ പൊലീസിൽ പരാതി നൽകി. പ്രതിഷേധവുമായി ബന്ധപ്പെട്ട് ആവശ്യമായ സുരക്ഷാ, മെഡിക്കൽ സംവിധാനങ്ങൾ ഒരുക്കിയിരുന്നില്ലെന്നാണ് പരാതിയിലെ പ്രധാന ആരോപണം.
മലയാളിയായ ജി.എസ്. പിള്ളയുടെ മരണം ഉൾപ്പെടെയുള്ള സംഭവങ്ങൾ ചൂണ്ടിക്കാട്ടിയാണ് പരാതി നൽകിയിരിക്കുന്നത്. പ്രതിഷേധ പരിപാടി നിയമവിരുദ്ധമായിരുന്നുവെന്നും ഇതുമായി ബന്ധപ്പെട്ട് വിശദമായ അന്വേഷണം നടത്തണമെന്നും പരാതിയിൽ ആവശ്യപ്പെടുന്നു.
അഭിജിത് ദീപ്കെയുടെ പ്രവർത്തനങ്ങളെക്കുറിച്ച് അന്വേഷണം നടത്തുകയും ആവശ്യമായ നിയമനടപടികൾ സ്വീകരിക്കുകയും വേണമെന്ന ആവശ്യവും പരാതിയിൽ ഉന്നയിച്ചിട്ടുണ്ട്. സംഭവവുമായി ബന്ധപ്പെട്ട് പൊലീസ് കൂടുതൽ അന്വേഷണം തുടരുകയാണ്.
