റഷ്യയും ഉക്രെയ്നും തമ്മിലുള്ള സംഘർഷം വീണ്ടും രൂക്ഷമായി. ഞായറാഴ്ച റഷ്യൻ പ്രദേശങ്ങളിൽ ആയിരത്തിലധികം ഡ്രോണുകൾ ഉപയോഗിച്ച് ഉക്രെയ്ൻ നടത്തിയ ആക്രമണത്തിന് പിന്നാലെ റഷ്യ തിരിച്ചടി ശക്തമാക്കിയതായാണ് റിപ്പോർട്ടുകൾ. ഇതിന്റെ ഭാഗമായി ഉക്രെയ്നിലെ പ്രധാന നഗരമായ സപോരിഷിയയിൽ റഷ്യൻ ആക്രമണം ശക്തമായതായി റിപ്പോർട്ടുണ്ട്.
സപോരിഷിയയിലെ ഷോപ്പിംഗ് മാളുകൾക്കും പാർപ്പിട സമുച്ചയങ്ങൾക്കും നേരെ റഷ്യൻ സൈന്യം ആക്രമണം നടത്തിയതായി ഉക്രെയ്ൻ പ്രസിഡന്റ് വോളോഡിമർ സെലെൻസ്കി ആരോപിച്ചു. ആക്രമണങ്ങളിൽ നിരവധി സാധാരണക്കാർക്ക് പരിക്കേറ്റതായും അദ്ദേഹം സോഷ്യൽ മീഡിയയിലൂടെ അറിയിച്ചു.
അതേസമയം, റഷ്യൻ എണ്ണ ശുദ്ധീകരണശാലകളെ ലക്ഷ്യമിട്ട് ഉക്രെയ്ൻ നടത്തിയ ആക്രമണങ്ങളെ യുഎസ് പ്രസിഡന്റ് ഡൊണാൾഡ് ട്രംപ് വിമർശിച്ചു. ഉക്രെയ്ൻ നടത്തിയ നടപടികൾ നിരുത്തരവാദപരമാണെന്നും ഇത് മോസ്കോയുടെ നിയന്ത്രണം നഷ്ടപ്പെടുന്നതിലേക്ക് നയിച്ചതായും ട്രംപ് പ്രതികരിച്ചു.
ഇരു രാജ്യങ്ങളും പരസ്പര ആക്രമണം തുടരുന്നതിനിടെ വെടിനിർത്തൽ ചർച്ചകൾക്ക് തിരിച്ചടി നേരിടുന്ന സാഹചര്യമാണ് നിലവിലുള്ളത്. ഈ ആഴ്ച ന്യൂയോർക്കിൽ നടക്കുന്ന ഐക്യരാഷ്ട്രസഭയുടെ പൊതുസഭാ സമ്മേളനത്തിനിടെ സംഘർഷം കുറയ്ക്കുന്നതിനുള്ള വഴികൾ ചർച്ച ചെയ്യാൻ സെലെൻസ്കി ട്രംപുമായി കൂടിക്കാഴ്ച നടത്താൻ സാധ്യതയുണ്ടെന്നാണ് റിപ്പോർട്ടുകൾ.
