സിഎംആർഎൽ–എക്സാലോജിക് കേസിൽ അപ്പീൽ അനുവദിക്കാതിരുന്ന ഹൈക്കോടതി ഡിവിഷൻ ബെഞ്ചിന്റെ ഉത്തരവിനെതിരെ മുഖ്യമന്ത്രി പിണറായി വിജയൻ സുപ്രീംകോടതിയെ സമീപിച്ചു. ഹൈക്കോടതി സിംഗിൾ ബെഞ്ചിന്റെ ഉത്തരവ് ഡിവിഷൻ ബെഞ്ച് ശരിവച്ചതിന് പിന്നാലെയാണ് പിണറായി വിജയൻ ഉൾപ്പെടെയുള്ളവർ സുപ്രീംകോടതിയിൽ അപ്പീൽ സമർപ്പിച്ചത്. ഹർജി ഇന്ന് തന്നെ പരിഗണിച്ചേക്കുമെന്നാണ് വിവരം.
ഹൈക്കോടതി ഡിവിഷൻ ബെഞ്ചിന്റെ ഉത്തരവ് പുറത്തുവന്നതിന് പിന്നാലെ മുതിർന്ന അഭിഭാഷകരുമായി കൂടിയാലോചന നടത്തിയ ശേഷമാണ് സുപ്രീംകോടതിയിൽ അപ്പീൽ നൽകിയത്. സിംഗിൾ ബെഞ്ചിന്റെ ഉത്തരവ് നിയമപരമല്ലെന്നും തങ്ങളുടെ ഭാഗം കേൾക്കാതെയാണ് ഉത്തരവിട്ടതെന്നും അപ്പീലിൽ ചൂണ്ടിക്കാട്ടിയിട്ടുണ്ട്.
കേസിൽ എഫ്‌ഐആർ രജിസ്റ്റർ ചെയ്യാമെന്ന സിംഗിൾ ബെഞ്ചിന്റെ ഉത്തരവിനെതിരെ പിണറായി വിജയൻ ഉൾപ്പെടെയുള്ളവർ ഡിവിഷൻ ബെഞ്ചിനെ സമീപിച്ചിരുന്നു. എന്നാൽ, സ്വാഭാവികനീതി ലംഘിക്കപ്പെട്ടെന്ന വാദം അംഗീകരിക്കാതെ സിംഗിൾ ബെഞ്ച് ഉത്തരവ് ഡിവിഷൻ ബെഞ്ച് ശരിവയ്ക്കുകയായിരുന്നു.
തങ്ങളുടെ വാദം കേൾക്കാതെയാണ് സിംഗിൾ ബെഞ്ചും ഡിവിഷൻ ബെഞ്ചും തീരുമാനമെടുത്തതെന്നാണ് ഹർജിക്കാരുടെ നിലപാട്. പ്രതിഭാഗത്തിന് വാദങ്ങൾ അവതരിപ്പിക്കാൻ അവസരം നൽകേണ്ടതായിരുന്നുവെന്നും അപ്പീലിൽ പറയുന്നു. മൗലികാവകാശങ്ങൾ സംരക്ഷിക്കണമെന്നും ഹർജി പരിഗണിക്കണമെന്നുമാണ് സുപ്രീംകോടതിയോടുള്ള ആവശ്യം.
ഹർജി സുപ്രീംകോടതി പരിഗണിക്കുന്നതോടെ സിഎംആർഎൽ–എക്സാലോജിക് കേസിലെ നിയമനടപടികൾ പുതിയ ഘട്ടത്തിലേക്ക് കടക്കും.
