പ്രതിപക്ഷ പാർട്ടികളും കോക്രോച്ച് ജനതാ പാർട്ടിയും ആഹ്വാനം ചെയ്ത പ്രതിഷേധങ്ങളുടെ പശ്ചാത്തലത്തിൽ ഒക്ടോബർ 10ന് ഡൽഹി മെട്രോ സർവീസുകൾ റദ്ദാക്കുകയോ വെട്ടിക്കുറയ്ക്കുകയോ ചെയ്തിട്ടില്ലെന്ന് ഡൽഹി മെട്രോ റെയിൽ കോർപ്പറേഷൻ (ഡിഎംആർസി). മുൻകരുതൽ നടപടിയായി ചില സ്റ്റേഷനുകളിൽ യാത്രക്കാരുടെ പ്രവേശനവും പുറത്തുകടക്കലും താൽക്കാലികമായി നിയന്ത്രിച്ചെങ്കിലും സർവീസുകളുടെ എണ്ണത്തിൽ കുറവുണ്ടായിട്ടില്ലെന്ന് സുപ്രീം കോടതിയിൽ സമർപ്പിച്ച സത്യവാങ്മൂലത്തിൽ ഡിഎംആർസി വ്യക്തമാക്കി.
എൻഡിടിവിക്ക് ലഭിച്ച സത്യവാങ്മൂലത്തിന്റെ പകർപ്പ് പ്രകാരം, സാധാരണ ശനിയാഴ്ചത്തെ സമയക്രമം അനുസരിച്ച് ഒക്ടോബർ 10ന് 271 ട്രെയിനുകളാണ് സർവീസ് നടത്തിയത്. നെറ്റ്‌വർക്കിലുടനീളം 4,157 ട്രിപ്പുകളും നടത്തി. ആകെ 303 സ്റ്റേഷനുകളിൽ 57 സ്റ്റേഷനുകളിൽ മാത്രമാണ് യാത്രക്കാരുടെ പ്രവേശനവും പുറത്തുകടക്കലും താൽക്കാലികമായി നിയന്ത്രിച്ചത്. ഇതോടെ മെട്രോ ശൃംഖലയുടെ ഏകദേശം 85 ശതമാനവും പതിവുപോലെ പ്രവർത്തിച്ചുവെന്ന് ഡിഎംആർസി അറിയിച്ചു.
യാത്രക്കാർക്കുള്ള ബുദ്ധിമുട്ട് കുറയ്ക്കുന്നതിനായി പരിമിതമായ സ്റ്റേഷനുകളിൽ മാത്രമാണ് നിയന്ത്രണങ്ങൾ ഏർപ്പെടുത്തിയതെന്നും സമീപത്തെ മറ്റ് സ്റ്റേഷനുകൾ തുറന്നുതന്നെ പ്രവർത്തിച്ചെന്നും സത്യവാങ്മൂലത്തിൽ പറയുന്നു. 45 ഇന്റർചേഞ്ച് സ്റ്റേഷനുകളിൽ 14 എണ്ണത്തിലും സർവീസുകൾ തടസ്സമില്ലാതെ തുടർന്നു. കോടതിയുടെ ഇടപെടലിന് പിന്നാലെ നിയന്ത്രണം ഏർപ്പെടുത്തിയ സ്റ്റേഷനുകളുടെ എണ്ണം പുനഃപരിശോധിച്ച് കുറച്ചതായും ഡിഎംആർസി വ്യക്തമാക്കി.
അതേസമയം, ഒക്ടോബർ 10ന് ഡൽഹി മെട്രോയിൽ യാത്ര ചെയ്തത് 32 ലക്ഷം പേർ മാത്രമാണെന്നും ഡിഎംആർസി അറിയിച്ചു. രണ്ടാം ശനിയാഴ്ചകളിൽ സാധാരണയായി യാത്രക്കാരുടെ എണ്ണം 58 ലക്ഷത്തോളമാകാറുണ്ട്. പ്രതിഷേധങ്ങളുടെ പശ്ചാത്തലത്തിൽ നിരവധി പേർ യാത്ര ഒഴിവാക്കിയതാണ് യാത്രക്കാരുടെ എണ്ണത്തിലുണ്ടായ ഗണ്യമായ കുറവിന് കാരണമെന്നാണ് വിലയിരുത്തൽ.
മെട്രോ സർവീസുകൾ വെട്ടിക്കുറച്ചെന്ന ആരോപണങ്ങൾക്കിടെയാണ് പ്രവർത്തനങ്ങളുടെ വിശദാംശങ്ങൾ ഉൾപ്പെടുത്തി ഡിഎംആർസി സുപ്രീം കോടതിയിൽ സത്യവാങ്മൂലം സമർപ്പിച്ചത്.
