ഇന്ത്യൻ ക്രിക്കറ്റ് ഇതിഹാസം എം.എസ്. ധോണി ഐപിഎല്ലിൽ കളിക്കാരനെന്ന നിലയിലുള്ള യാത്ര അവസാനിപ്പിക്കുന്നു. എന്നാൽ ചെന്നൈ സൂപ്പർ കിംഗ്സുമായുള്ള ബന്ധം അവസാനിപ്പിക്കില്ല. 2027 ഐപിഎൽ സീസൺ മുതൽ ടീമിന്റെ മെന്ററായി ധോണി പുതിയ ചുമതല ഏറ്റെടുക്കുമെന്നാണ് റിപ്പോർട്ടുകൾ. ഐപിഎൽ നിലനിർത്തൽ നടപടികൾക്ക് മുന്നോടിയായി കളിക്കാരനെന്ന നിലയിലുള്ള കരാറിൽനിന്ന് ഒഴിവാക്കണമെന്ന് ധോണി തന്നെ ആവശ്യപ്പെട്ടതിനെ തുടർന്നാണ് മാനേജ്മെന്റിന്റെ തീരുമാനമെന്നാണ് വിവരം.
ധോണിയുടെ തീരുമാനത്തോട് ഇന്ത്യൻ താരം രോഹിത് ശർമയും സോഷ്യൽ മീഡിയയിലൂടെ പ്രതികരിച്ചു. അതുല്യമായ ഐപിഎൽ യാത്രയ്ക്ക് ധോണിയെ അഭിനന്ദിച്ച രോഹിത്, കളിക്കളത്തിലും പുറത്തും അദ്ദേഹത്തോടൊപ്പം പങ്കിട്ട ഓർമകൾ എന്നും മനസ്സിലുണ്ടാകുമെന്നും കുറിച്ചു. ധോണിയോടുള്ള ബഹുമാനം ഒരിക്കലും കുറയില്ലെന്നും രോഹിത് വ്യക്തമാക്കി.
ധോണിയില്ലാത്ത ചെന്നൈ സൂപ്പർ കിംഗ്സിനെ സങ്കൽപ്പിക്കാൻ കഴിയില്ലെന്ന് ടീം ഉടമകളിലൊരാളായ എൻ. ശ്രീനിവാസൻ പ്രതികരിച്ചു. അതേസമയം, ടീം പരിവർത്തന ഘട്ടത്തിലൂടെ കടന്നുപോകുന്ന സാഹചര്യത്തിൽ ധോണിയുടെ അനുഭവസമ്പത്ത് പുതിയ തലമുറയിലെ താരങ്ങളെ വാർത്തെടുക്കാൻ സഹായിക്കുമെന്ന് സഹ ഉടമ രൂപ ഗുരുനാഥ് പറഞ്ഞു. കളിക്കാരനെന്ന നിലയിൽ നിന്ന് മെന്ററെന്ന നിലയിലേക്കുള്ള ധോണിയുടെ മാറ്റം ചെന്നൈ ടീമിന്റെ ഭാവി മുന്നേറ്റത്തിൽ നിർണായകമാകുമെന്നാണ് വിലയിരുത്തൽ.
