പഞ്ചാബ് പ്രദേശ് കോൺഗ്രസ് കമ്മിറ്റി അധ്യക്ഷ സ്ഥാനത്ത് നിന്ന് അമരീന്ദർ സിംഗ് രാജ വാറിംഗ് രാജിവെച്ചു . കോൺഗ്രസ് ജനറൽ സെക്രട്ടറി കെ.സി. വേണുഗോപാലിന് രാജിക്കത്ത് കൈമാറിയതായാണ് റിപ്പോർട്ട്. 2027ലെ നിയമസഭാ തിരഞ്ഞെടുപ്പിന് മാസങ്ങൾ മാത്രം ശേഷിക്കെയാണ് സംസ്ഥാന നേതൃത്വത്തിൽ മാറ്റം.
പഞ്ചാബ് കോൺഗ്രസിലെ മാസങ്ങളായി തുടരുന്ന ആഭ്യന്തര അഭിപ്രായവ്യത്യാസങ്ങളാണ് നേതൃമാറ്റത്തിന് പ്രധാന കാരണമായി റിപ്പോർട്ട് ചെയ്യപ്പെടുന്നത്. രാജ വാറിംഗിനെ പിന്തുണയ്ക്കുന്ന വിഭാഗവും മുൻ മുഖ്യമന്ത്രി ചരൺജിത് സിംഗ് ചന്നിയുമായി അടുപ്പമുള്ള നേതാക്കളും തമ്മിലുള്ള ഭിന്നത പരിഹരിക്കാൻ നേതൃത്വത്തിന്റെ വിവിധ ഇടപെടലുകൾ നടന്നിരുന്നു.
പഞ്ചാബിന്റെ പുതിയ ചുമതലയുള്ള എഐസിസി ജനറൽ സെക്രട്ടറി സച്ചിൻ പൈലറ്റ് സംസ്ഥാനത്തെ നേതാക്കളുമായും പ്രവർത്തകരുമായും കൂടിക്കാഴ്ച നടത്തിയിരുന്നു. സംഘടനയിലെ പ്രശ്നങ്ങളെക്കുറിച്ചുള്ള വിവരങ്ങൾ ഹൈക്കമാൻഡിന് കൈമാറിയതിനു പിന്നാലെയാണ് രാജ വാറിംഗിനെ മാറ്റാനുള്ള തീരുമാനം വന്നതെന്ന് റിപ്പോർട്ടുകൾ പറയുന്നു.
രാജ വാറിംഗിന് പകരക്കാരനായി മുൻ മന്ത്രി വിജയ് ഇന്ദർ സിംഗ്ലയുടെ പേര് പ്രധാനമായും ഉയർന്നുവരുന്നുണ്ട്. സുഖ്ജീന്ദർ സിംഗ് രൺധാവ, പർഗത് സിംഗ്, സുഖ്ബിന്ദർ സിംഗ് സർക്കാരിയ തുടങ്ങിയ നേതാക്കളുടെ പേരുകളും പരിഗണനയിലുണ്ടെന്നാണ് റിപ്പോർട്ടുകൾ. അന്തിമ തീരുമാനം കോൺഗ്രസ് ഹൈക്കമാൻഡ് എടുക്കും.
2027ലെ നിയമസഭാ തിരഞ്ഞെടുപ്പിന് മുന്നോടിയായി പഞ്ചാബ് ഘടകത്തിൽ സംഘടനാപരമായ പുനഃസംഘടന നടത്തുന്നതിന്റെ ഭാഗമായാണ് മാറ്റം. പുതിയ സംസ്ഥാന അധ്യക്ഷനെ പ്രഖ്യാപിക്കുന്നതോടെ വിഭാഗീയത പരിഹരിച്ച് സംഘടനയെ ശക്തിപ്പെടുത്തുകയാണ് നേതൃത്വത്തിന്റെ ലക്ഷ്യമെന്നാണ് റിപ്പോർട്ടുകൾ.
