പാകിസ്ഥാനിലെ ഖൈബർ പഖ്തൂൺഖ്വ പ്രവിശ്യയിൽ അടിയന്തരാവസ്ഥ പ്രഖ്യാപിച്ചതിനു പിന്നാലെ പ്രതിഷേധം അക്രമാസക്തമായതായി റിപ്പോർട്ടുകൾ. ഗവർണറുടെ വസതിക്ക് തീയിട്ടതിന്റെ ദൃശ്യങ്ങൾ സമൂഹമാധ്യമങ്ങളിൽ പ്രചരിക്കുന്നുണ്ട്. വിവിധ നഗരങ്ങളിൽ പോലീസ് വെടിവയ്പ്പും ഷെല്ലാക്രമണവും നടന്നതായി പുറത്തുവന്ന വീഡിയോകളും ആശങ്കയുണ്ടാക്കുന്നു. സംഭവങ്ങളിൽ നാശനഷ്ടങ്ങളോ ആളപായമോ ഉണ്ടായിട്ടുണ്ടോ എന്നതിൽ വ്യക്തമായ വിവരങ്ങൾ ലഭ്യമായിട്ടില്ല.
ജയിലിൽ കഴിയുന്ന മുൻ പ്രധാനമന്ത്രി ഇമ്രാൻ ഖാന്റെ പാകിസ്ഥാൻ തെഹ്‌രീക്-ഇ-ഇൻസാഫ് (പി.ടി.ഐ) പാർട്ടിയുടെ നേതൃത്വത്തിലുള്ള പ്രവിശ്യാ സർക്കാരിനെ മാറ്റിനിർത്തി കേന്ദ്ര സർക്കാർ അടിയന്തര നടപടി സ്വീകരിച്ചതാണ് പ്രതിഷേധങ്ങൾക്ക് കാരണമായത്. ഞായറാഴ്ച നിരവധി പേർ തെരുവിലിറങ്ങി. ഇസ്ലാമാബാദിൽ പി.ടി.ഐയുടെ നേതൃത്വത്തിൽ നടന്ന റാലിയെയും സുരക്ഷാ നടപടികൾ ബാധിച്ചതായാണ് റിപ്പോർട്ട്.
പ്രതിഷേധങ്ങളുമായി ബന്ധപ്പെട്ട് സ്വാബിയിൽ 59 പി.ടി.ഐ പ്രവർത്തകരെയും ഖൈബർ ജില്ലയിൽ ആറുപേരെയും പോലീസ് അറസ്റ്റ് ചെയ്തതായി പ്രാദേശിക മാധ്യമങ്ങൾ റിപ്പോർട്ട് ചെയ്തു. മുൻ മുഖ്യമന്ത്രി സൊഹൈൽ അഫ്രീദിയെയും പി.ടി.ഐ പ്രവിശ്യാ പ്രസിഡന്റ് ജുനൈദ് അക്ബറിനെയും കസ്റ്റഡിയിലെടുത്തതായും റിപ്പോർട്ടുകളുണ്ട്. മറ്റൊരു മുൻ മുഖ്യമന്ത്രിയായ അലി അമിൻ ഖാൻ ഗന്ധാപൂർ വീട്ടുതടങ്കലിലാണെന്ന് അറിയിച്ചതായും റിപ്പോർട്ടുകൾ പറയുന്നു.
പ്രവിശ്യയിലെ പ്രധാന കവലകളിലും ദേശീയപാതകളിലും സുരക്ഷാസേനയെ വിന്യസിച്ചിട്ടുണ്ട്. സ്വാബിയിൽ മൊബൈൽ ഫോൺ, പി.ടി.സി.എൽ ഇന്റർനെറ്റ് സേവനങ്ങൾ താൽക്കാലികമായി തടഞ്ഞതായും റിപ്പോർട്ടുണ്ട്. അതേസമയം, കേന്ദ്ര സർക്കാരിന്റെ നടപടിയെ ജനാധിപത്യത്തിനെതിരായ നീക്കമെന്ന് വിശേഷിപ്പിച്ച പി.ടി.ഐ, അറസ്റ്റിലായ നേതാക്കളെ മോചിപ്പിക്കണമെന്നും തീരുമാനത്തെ കോടതികളിലും പൊതുരംഗത്തും ചോദ്യം ചെയ്യുമെന്നും വ്യക്തമാക്കി.
