ഉറക്കത്തിലൂടെ രോഗശമനം സാധ്യമാകുമെന്ന വിശ്വാസത്തിന് ആയിരക്കണക്കിന് വർഷങ്ങളുടെ പഴക്കമുണ്ട്. പുരാതന ഗ്രീസിൽ വൈദ്യദേവനായ അസ്ക്ലേപിയസിന്റെ പേരിലുള്ള ക്ഷേത്രങ്ങളിൽ രോഗികൾക്ക് ഉറക്കത്തിലൂടെ ചികിത്സ നൽകിയിരുന്നുവെന്നാണ് ചരിത്രരേഖകൾ വ്യക്തമാക്കുന്നത്. ‘എൻകോയിമെസിസ്’ എന്നറിയപ്പെട്ടിരുന്ന ഈ രീതി ശാരീരിക രോഗങ്ങൾക്കൊപ്പം മാനസിക വിഷമങ്ങൾക്കും ആശ്വാസം നൽകാനുള്ള ചികിത്സാരീതിയായിരുന്നു.
ചികിത്സയ്ക്കായി എത്തിയവർ ആദ്യം ഉപവാസം, കുളി, വ്യായാമം, പ്രാർഥന തുടങ്ങിയ ശുദ്ധീകരണ ചടങ്ങുകളിൽ പങ്കെടുത്തിരുന്നു. തുടർന്ന് പ്രത്യേകമായി ഒരുക്കിയിരുന്ന ഉറക്കമുറികളിൽ രാത്രി ചെലവഴിക്കും. ഉറക്കത്തിൽ അസ്ക്ലേപിയസ് പ്രത്യക്ഷപ്പെട്ട് രോഗനിർണയം നടത്തുകയോ മരുന്ന് നിർദേശിക്കുകയോ രോഗം ഭേദമാക്കുകയോ ചെയ്യുമെന്നായിരുന്നു വിശ്വാസം. എപ്പിഡോറസിലെ അസ്ക്ലേപിയസ് ക്ഷേത്രം ഇത്തരം ചികിത്സകൾക്ക് ഏറെ പ്രസിദ്ധമായിരുന്നു.
ഈ പുരാതന ചികിത്സാരീതിക്ക് ആധുനിക വൈദ്യശാസ്ത്രവുമായി ചില കൗതുകകരമായ ബന്ധങ്ങളുണ്ടെന്ന് 2025ൽ പ്രസിദ്ധീകരിച്ച പഠനം ചൂണ്ടിക്കാട്ടുന്നു. ഉറക്കം, മാനസികാവസ്ഥ, ചികിത്സാ സാഹചര്യങ്ങൾ, രോഗിയുടെ പ്രതീക്ഷകൾ എന്നിവ രോഗശമനത്തെ സ്വാധീനിക്കുമെന്ന തിരിച്ചറിവാണ് ഇതിലെ പ്രധാനപ്പെട്ട വശം.
പ്രത്യേകിച്ച് പ്ലാസിബോ പ്രഭാവവുമായി ഈ ചികിത്സാരീതിക്ക് ബന്ധമുണ്ടെന്നാണ് പഠനത്തിന്റെ വിലയിരുത്തൽ. ചികിത്സയിലുള്ള വിശ്വാസവും ഡോക്ടറുമായുള്ള ബന്ധവും രോഗിയുടെ മാനസികാവസ്ഥയും വേദന ഉൾപ്പെടെയുള്ള ലക്ഷണങ്ങളുടെ അനുഭവത്തെ സ്വാധീനിക്കാം. എന്നാൽ പുരാതന ഉറക്കചികിത്സയെ ആധുനിക ശാസ്ത്രീയ ചികിത്സയ്ക്ക് തുല്യമായി കാണാനാകില്ലെന്നും ഗവേഷകർ വ്യക്തമാക്കുന്നു.
ഇന്ന് ഉറക്കത്തിന്റെ പ്രാധാന്യം വൈദ്യശാസ്ത്രം കൂടുതൽ ഗൗരവത്തോടെയാണ് കാണുന്നത്. ഉറക്കക്കുറവ്, ഉറക്കത്തിലെ തടസ്സങ്ങൾ, മാനസിക സമ്മർദം എന്നിവ ആരോഗ്യത്തെ പ്രതികൂലമായി ബാധിക്കാം. അതുകൊണ്ടുതന്നെ രോഗിയുടെ ശാരീരികാവസ്ഥയ്ക്കൊപ്പം മാനസികാരോഗ്യത്തിനും വിശ്രമത്തിനും ചികിത്സാ അന്തരീക്ഷത്തിനും പ്രാധാന്യം നൽകേണ്ടതുണ്ടെന്ന പുരാതന ഗ്രീക്ക് തിരിച്ചറിവ് ഇന്നും പ്രസക്തമാണ്.
