പ്രശസ്ത നടൻ നസീറുദ്ദീൻ ഷായെ ‘അപകടകാരിയായ അർബൻ ദിമാഗി നക്സൽ’ എന്ന് വിശേഷിപ്പിച്ച് കേന്ദ്ര ന്യൂനപക്ഷകാര്യ മന്ത്രി കിരൺ റിജിജു. ഷായുടെ നിലപാടുകൾ ഇന്ത്യൻ ജനാധിപത്യത്തിന് ഹാനികരമാണെന്നും മന്ത്രി ആരോപിച്ചു. രാജ്യത്തെ വിദ്യാഭ്യാസ സമ്പ്രദായം തകർക്കാനും യുവാക്കളുടെ ആത്മവീര്യം കെടുത്താനും കേന്ദ്ര സർക്കാർ ശ്രമിക്കുന്നുവെന്നാരോപിച്ച് നസീറുദ്ദീൻ ഷാ സമൂഹമാധ്യമങ്ങളിൽ വീഡിയോ പങ്കുവെച്ചതിന് പിന്നാലെയാണ് റിജിജുവിന്റെ വിമർശനം.
നസീറുദ്ദീൻ ഷായെ ഒരു സാധാരണ നടനായി കണ്ട് താൻ ഒരുകാലത്ത് ഏറെ ബഹുമാനിക്കുകയും ഇഷ്ടപ്പെടുകയും ചെയ്തിരുന്നുവെന്ന് എക്സിലെ പോസ്റ്റിൽ റിജിജു കുറിച്ചു. അദ്ദേഹത്തിന്റെ യഥാർഥ സ്വഭാവം തിരിച്ചറിയാൻ വൈകിയെന്നും ഇത്ര അപകടകാരിയായ ഒരു ‘ദിമാഗി നക്സൽ’ ആണെന്ന് കരുതിയിരുന്നില്ലെന്നും മന്ത്രി പറഞ്ഞു. ഷായുടെ അഭിപ്രായങ്ങൾ രാജ്യത്തിന്റെ ജനാധിപത്യത്തിന് അത്യന്തം ഹാനികരമാണെന്നും അദ്ദേഹം ആരോപിച്ചു.
ഭരണസംവിധാനങ്ങൾക്കുള്ളിൽ നിന്നുകൊണ്ട് നയങ്ങളെ അട്ടിമറിക്കുകയും സമൂഹത്തിന് ഭീഷണിയുയർത്തുകയും ചെയ്യുന്ന ആശയപരമായ നക്സലുകളെ വിശേഷിപ്പിക്കാൻ പ്രധാനമന്ത്രി നരേന്ദ്ര മോദി സ്വാതന്ത്ര്യദിന പ്രസംഗത്തിൽ ഉപയോഗിച്ച പദമാണ് ‘ദിമാഗി നക്സൽ’.
ജാമിയ മില്ലിയ ഇസ്ലാമിയ സർവകലാശാലയിലെ വിദ്യാർഥികളുടെ സമരത്തിന് പിന്തുണ പ്രഖ്യാപിച്ചുകൊണ്ടാണ് നസീറുദ്ദീൻ ഷാ ഫേസ്ബുക്കിൽ വീഡിയോ പങ്കുവെച്ചത്. യൂണിയൻ പുനഃസ്ഥാപിക്കണമെന്നാവശ്യപ്പെട്ടാണ് വിദ്യാർഥികൾ സമരം ചെയ്യുന്നത്. താനൊരു ‘ദിമാഗി നക്സൽ’ ആണെന്ന് അഭിമാനത്തോടെ പ്രഖ്യാപിക്കുന്നുവെന്ന് പറഞ്ഞ ഷാ, ആ വാക്കുകൾ രേഖപ്പെടുത്തിയ ബാഡ്ജും വീഡിയോയിൽ ഉയർത്തിക്കാട്ടി.
തന്നെപ്പോലെയുള്ളവരെ രാജ്യദ്രോഹികളെന്നും ‘തുക്‌ടെ-തുക്‌ടെ’ സംഘമെന്നും രാജ്യത്തെ കാവൽക്കാർ വിശേഷിപ്പിക്കാറുണ്ടെന്നും അദ്ദേഹം പരിഹസിച്ചു. യുവാക്കളുടെ ആത്മവീര്യം തകർക്കാനും വിദ്യാഭ്യാസം നശിപ്പിക്കാനും ജനാധിപത്യത്തെ അപകടത്തിലാക്കാനും കേന്ദ്ര സർക്കാർ എത്രത്തോളം മുന്നോട്ടുപോകുമെന്ന ചോദ്യവും ഷാ ഉന്നയിച്ചു.
നീറ്റ് പരീക്ഷാ ക്രമക്കേടുകളിലും കൊൽക്കത്തയിലെ സത്യജിത് റേ ഫിലിം ഇൻസ്റ്റിറ്റ്യൂട്ടിലെ വിദ്യാർഥി സമരങ്ങളിലും കേന്ദ്ര സർക്കാരിനെതിരെ നിലപാടെടുത്തിട്ടുള്ള വ്യക്തിയാണ് 76കാരനായ നസീറുദ്ദീൻ ഷാ. പുതിയ വീഡിയോയും അതിനെതിരായ കേന്ദ്രമന്ത്രിയുടെ പ്രതികരണവും രാഷ്ട്രീയ-സാമൂഹിക തലങ്ങളിൽ ചർച്ചയായിരിക്കുകയാണ്.
