വോട്ടർപട്ടികയിലെ സ്‌പെഷ്യൽ ഇന്റൻസീവ് റിവിഷൻ (എസ്‌ഐആർ) നടപടിക്കെതിരെ പ്രതിപക്ഷം നടത്തുന്ന പ്രതിഷേധത്തിനിടെ കോൺഗ്രസ് നേതാവ് രാഹുൽ ഗാന്ധിക്കെതിരെ ഡിഎംകെ നേതാവിന്റെ വിമർശനം. തമിഴ്നാട്ടിലെ എസ്‌ഐആർ വിഷയത്തിൽ രാഹുൽ ഗാന്ധിയുടെ നിലപാട് എന്താണെന്ന് ചോദിച്ചാണ് ഡിഎംകെ നേതാവ് ശരവണൻ അണ്ണാദുരൈ രംഗത്തെത്തിയത്.
സാമൂഹികമാധ്യമമായ എക്‌സിലൂടെയാണ് ശരവണൻ അണ്ണാദുരൈ രാഹുൽ ഗാന്ധിയെ നേരിട്ട് വിമർശിച്ചത്. തമിഴ്നാട്ടിൽ എസ്‌ഐആറിന്റെ ഭാഗമായി വോട്ടർമാരെ നീക്കം ചെയ്യുന്നതിനെക്കുറിച്ച് രാഹുൽ ഗാന്ധി എന്താണ് പറയുന്നതെന്ന് അദ്ദേഹം ചോദിച്ചു.
എസ്‌ഐആറിന് ശേഷം തെരഞ്ഞെടുക്കപ്പെട്ട എല്ലാ സംസ്ഥാന സർക്കാരുകളെയും പിരിച്ചുവിടണമെന്ന കോൺഗ്രസ് അധ്യക്ഷൻ മല്ലികാർജുൻ ഖർഗെയുടെ അഭിപ്രായത്തെ രാഹുൽ ഗാന്ധി എന്തുകൊണ്ട് പിന്തുണയ്ക്കുന്നില്ലെന്നും അണ്ണാദുരൈ ചോദിച്ചു. തമിഴ്നാട്ടിലെ എസ്‌ഐആർ വിഷയത്തിൽ സംസാരിക്കാൻ നടൻ വിജയ് ഭയപ്പെടുന്നുണ്ടോയെന്നും അദ്ദേഹം പരിഹസിച്ചു. നിലപാടുകളിൽ ഇരട്ടത്താപ്പുണ്ടെന്ന വിമർശനവും ഡിഎംകെ നേതാവ് ഉന്നയിച്ചു.
തമിഴ്നാട്ടിലെ രാഷ്ട്രീയ സാഹചര്യങ്ങളിൽ കോൺഗ്രസും ഡിഎംകെയും തമ്മിലുള്ള ബന്ധത്തിൽ അടുത്തിടെ അഭിപ്രായവ്യത്യാസങ്ങൾ ശക്തമായിരുന്നു. ഇതിന്റെ പശ്ചാത്തലത്തിലാണ് എസ്‌ഐആർ വിഷയത്തിൽ രാഹുൽ ഗാന്ധിക്കെതിരായ ഡിഎംകെ നേതാവിന്റെ വിമർശനം ശ്രദ്ധ നേടുന്നത്.
അതേസമയം, മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരായ പ്രതിപക്ഷ പ്രതിഷേധത്തെ ഡിഎംകെ പിന്തുണയ്ക്കുന്ന സാഹചര്യത്തിലും രാഹുൽ ഗാന്ധിയെ ലക്ഷ്യമിട്ടുള്ള വിമർശനം രാഷ്ട്രീയ ചർച്ചകൾക്ക് വഴിവെച്ചിട്ടുണ്ട്.
