നടനും മക്കൾ നീതി മയ്യം (എംഎൻഎം) അധ്യക്ഷനും രാജ്യസഭാംഗവുമായ കമൽഹാസന്റെ പുതിയ ചിത്രത്തിന്റെ പേരിനെച്ചൊല്ലി തമിഴ്‌നാട്ടിൽ വിവാദം. ജന്മദിനത്തോടനുബന്ധിച്ച് പ്രഖ്യാപിച്ച ‘സാന്ഡിയാർ’ എന്ന ചിത്രത്തിന്റെ പേരിനെതിരെ പുതിയ തമിഴ്ഗം (പി.ടി) പാർട്ടി പോലീസിൽ പരാതി നൽകി. പ്രാദേശികവും ജാതീയവുമായ സംഘർഷങ്ങൾക്ക് പേര് കാരണമാകുമെന്നാണ് പാർട്ടിയുടെ ആരോപണം.
കമൽഹാസന്റെ 72-ാം ജന്മദിനമായ നവംബർ ഏഴിനാണ് ചിത്രത്തിന്റെ ഫസ്റ്റ് ലുക്ക് പോസ്റ്റർ പുറത്തുവിട്ടത്. എസ്.യു. അരുൺ കുമാർ സംവിധാനം ചെയ്യുന്ന ചിത്രം രാജ് കമൽ ഫിലിംസ് ഇന്റർനാഷണലാണ് നിർമിക്കുന്നത്. ‘സാന്ഡിയാർ’ എന്ന പേര് ഒരു പ്രത്യേക വിഭാഗത്തിന്റെ ആധിപത്യവും അക്രമവും പ്രോത്സാഹിപ്പിക്കുന്നതാണെന്ന് പി.ടി പാർട്ടി സ്ഥാപകൻ ഡോ. കെ. കൃഷ്ണസ്വാമി ആരോപിച്ചു. പ്രത്യേകിച്ച് തെക്കൻ തമിഴ്‌നാട്ടിൽ ഈ പേര് ക്രമസമാധാന പ്രശ്നങ്ങൾക്ക് ഇടയാക്കാൻ സാധ്യതയുണ്ടെന്നും അദ്ദേഹം പറഞ്ഞു.
2003ൽ കമൽഹാസൻ ഇതേ പേര് ഒരു ചിത്രത്തിനായി പരിഗണിച്ചിരുന്നു. എന്നാൽ അന്ന് പി.ടി പാർട്ടിയുടെ നേതൃത്വത്തിൽ ശക്തമായ പ്രതിഷേധം ഉയർന്നതിനെത്തുടർന്ന് 2004 മാർച്ചിൽ ചിത്രത്തിന്റെ പേര് ‘വിരുമാണ്ടി’ എന്നാക്കി മാറ്റി. 23 വർഷത്തോളം പഴക്കമുള്ള വിവാദം വീണ്ടും ആവർത്തിക്കുന്നത് അനുചിതമാണെന്ന് കൃഷ്ണസ്വാമി പ്രതികരിച്ചു. രാജ്യസഭാംഗം എന്ന നിലയിൽ ഉത്തരവാദിത്തപ്പെട്ട സ്ഥാനത്തിരിക്കുന്ന കമൽഹാസൻ ഇത്തരം നടപടി സ്വീകരിക്കുന്നത് ശരിയല്ലെന്നും അദ്ദേഹം വിമർശിച്ചു.
അതേസമയം, പരാതിയിൽ പോലീസോ സിനിമയുടെ അണിയറപ്രവർത്തകരോ ഇതുവരെ ഔദ്യോഗിക പ്രതികരണം നടത്തിയിട്ടില്ല.
