മാധ്യമപ്രവർത്തകർക്ക് രഹസ്യവിവരങ്ങൾ ചോർത്തുന്ന സർക്കാർ ജീവനക്കാർക്ക് വധശിക്ഷ നൽകണമെന്ന് യുഎസ് പ്രസിഡന്റ് ഡൊണാൾഡ് ട്രംപ്. സൈനിക നീക്കങ്ങളുമായി ബന്ധപ്പെട്ട രഹസ്യവിവരങ്ങൾ മാധ്യമങ്ങൾക്ക് ചോർത്തുന്നവരെ ജയിലിലടയ്ക്കുകയും വെടിവച്ചുകൊല്ലുകയും വേണമെന്നാണ് ട്രംപിന്റെ പരാമർശം.
ബുധനാഴ്ച അരിസോണയിലെ ബുൾഹെഡ് സിറ്റിയിൽ നടന്ന ഇടക്കാല തിരഞ്ഞെടുപ്പ് റാലിയിൽ അനുയായികളെ അഭിസംബോധന ചെയ്യവെയാണ് ട്രംപ് ഇക്കാര്യം പറഞ്ഞത്. ബോംബർ വിമാനങ്ങളുടെ പുറപ്പെടൽ, എത്തിച്ചേരൽ സമയങ്ങൾ ന്യൂയോർക്ക് ടൈംസ്, സിഎൻഎൻ തുടങ്ങിയ മാധ്യമങ്ങൾക്ക് ചോർന്നതിനെത്തുടർന്ന് ഇറാനെതിരായ വ്യോമാക്രമണം മാറ്റിവയ്ക്കേണ്ടിവന്നുവെന്ന ആരോപണവും അദ്ദേഹം ഉന്നയിച്ചു.
കഴിഞ്ഞ വർഷം ഇറാന്റെ ഭൂഗർഭ ആണവ കേന്ദ്രങ്ങൾ ലക്ഷ്യമിട്ട് നടത്തിയ ബോംബാക്രമണത്തെക്കുറിച്ചാണോ ട്രംപ് പരാമർശിച്ചതെന്ന് ചില മാധ്യമങ്ങൾ വിലയിരുത്തിയെങ്കിലും, അദ്ദേഹം ഉദ്ദേശിച്ച സൈനിക നീക്കം ഏതാണെന്ന് വ്യക്തമായിട്ടില്ല. വിവരങ്ങൾ ചോർത്തിയ വ്യക്തിയെ കണ്ടെത്തിയാൽ കർശന നടപടി സ്വീകരിക്കണമെന്നും പഴയകാലത്ത് ഇത്തരം ചോർച്ചക്കാർക്ക് വെടിവയ്പ്പ് നേരിടേണ്ടിവന്നിരുന്നുവെന്നും ട്രംപ് പറഞ്ഞു. രാജ്യത്തെ ആക്രമിക്കാൻ പോകുന്ന സമയത്ത് സൈനിക വിവരങ്ങൾ ചോർത്തുന്നത് ഗുരുതരമായ കുറ്റമാണെന്നും അദ്ദേഹം കൂട്ടിച്ചേർത്തു.
ഇറാനെതിരായ യുഎസ്-ഇസ്രയേൽ സൈനിക നടപടി ഫെബ്രുവരി അവസാനത്തോടെ ആരംഭിച്ചതിനുശേഷം, സർക്കാർ ഉദ്യോഗസ്ഥർ മാധ്യമങ്ങൾക്ക് രഹസ്യവിവരങ്ങൾ നൽകുന്നതിനെതിരെ ട്രംപ് നിരന്തരം രംഗത്തെത്തിയിട്ടുണ്ട്. ഇത്തരം വിവരങ്ങൾ പ്രസിദ്ധീകരിക്കുന്ന മാധ്യമസ്ഥാപനങ്ങൾക്കെതിരെയും അദ്ദേഹം വിമർശനം ഉന്നയിച്ചിട്ടുണ്ട്. ചോർച്ചക്കാരെ കണ്ടെത്തിയാൽ വലിയ വില നൽകേണ്ടിവരുമെന്ന് കഴിഞ്ഞ മാസം ട്രൂത്ത് സോഷ്യലിൽ പങ്കുവച്ച കുറിപ്പിലും ട്രംപ് മുന്നറിയിപ്പ് നൽകിയിരുന്നു.
സൈനിക ആയുധശേഖരവുമായി ബന്ധപ്പെട്ട വിവരങ്ങൾ മാധ്യമങ്ങൾക്ക് ചോർന്നെന്ന ആരോപണവും അടുത്തിടെ വിവാദമായിരുന്നു. ദീർഘദൂര മിസൈലുകളുടെയും വ്യോമപ്രതിരോധ മിസൈലുകളുടെയും ക്ഷാമമുണ്ടെന്ന തരത്തിൽ തെറ്റായ വിവരങ്ങൾ നൽകിയെന്ന റിപ്പോർട്ടുകളെത്തുടർന്നാണ് ട്രംപ് വിമർശനം ഉന്നയിച്ചത്. എന്നാൽ, യുഎസിന്റെ കൈവശം ആവശ്യത്തിന് യുദ്ധസാമഗ്രികളുണ്ടെന്നും ആവശ്യാനുസരണം കൂടുതൽ ആയുധങ്ങൾ ഉൽപ്പാദിപ്പിക്കുന്നുണ്ടെന്നും അദ്ദേഹം അവകാശപ്പെട്ടു.
ചോർച്ചയുടെ ഉറവിടം കണ്ടെത്തുന്നതിനായി പെന്റഗൺ ഡസൻ കണക്കിന് സിവിലിയൻ ജീവനക്കാരെയും സൈനിക ഉദ്യോഗസ്ഥരെയും പോളിഗ്രാഫ് പരിശോധനയ്ക്ക് വിധേയരാക്കിയതായി ന്യൂയോർക്ക് ടൈംസ് റിപ്പോർട്ട് ചെയ്തിരുന്നു.
ഇറാനിൽ വെടിവച്ചിട്ട യുഎസ് എഫ്-15ഇ സ്ട്രൈക്ക് ഈഗിളിലെ രണ്ട് ജീവനക്കാരെ രക്ഷപ്പെടുത്തിയ ദൗത്യത്തിന്റെ വിശദാംശങ്ങൾ റിപ്പോർട്ട് ചെയ്ത മാധ്യമപ്രവർത്തകനോടും ഉറവിടങ്ങൾ വെളിപ്പെടുത്തണമെന്ന് ട്രംപ് ആവശ്യപ്പെട്ടിരുന്നു. ഉറവിടം വെളിപ്പെടുത്തിയില്ലെങ്കിൽ ജയിൽശിക്ഷ നേരിടേണ്ടിവരുമെന്നും അദ്ദേഹം മുന്നറിയിപ്പ് നൽകി. വിവരങ്ങൾ ചോർന്നത് സൈനികന്റെ ജീവൻ അപകടത്തിലാക്കിയെന്നായിരുന്നു ട്രംപിന്റെ വാദം.
