നിലവിലുള്ള വഖഫ് ബോർഡ് പിരിച്ചുവിട്ട് പുതിയ ബോർഡ് രൂപീകരിച്ച സർക്കാർ നടപടി പൂർണമായും നിയമവിരുദ്ധമാണെന്ന് സിപിഐഎം നേതാവ് പി. രാജീവ്. താൽപര്യമുള്ളവരെ ബോർഡിൽ ഉൾപ്പെടുത്തുന്നതിനായി നിയമവ്യവസ്ഥകളെ വെല്ലുവിളിക്കുകയും ഹൈക്കോടതിയുടെ നിരീക്ഷണത്തെ തെറ്റായി വ്യാഖ്യാനിക്കുകയുമാണ് സർക്കാർ ചെയ്തതെന്നും അദ്ദേഹം ആരോപിച്ചു. സമൂഹമാധ്യമത്തിലൂടെയായിരുന്നു പി. രാജീവിന്റെ പ്രതികരണം.
ജമാഅത്തെ ഇസ്‌ലാമിയുമായി ബന്ധപ്പെട്ടവരെയും സർക്കാരിന്റെ താൽപര്യക്കാരെയും ഉൾപ്പെടുത്തിയാണ് പുതിയ വഖഫ് ബോർഡ് രൂപീകരിച്ചതെന്നും അദ്ദേഹം വിമർശിച്ചു. നിലവിലുള്ള വഖഫ് നിയമത്തിൽ ബോർഡ് പിരിച്ചുവിടാൻ വ്യവസ്ഥയില്ലെന്നും പി. രാജീവ് ചൂണ്ടിക്കാട്ടി.
വഖഫ് നിയമത്തിലെ 99-ാം വകുപ്പ് പ്രകാരം മതിയായ കാരണങ്ങളുണ്ടെങ്കിൽ ബോർഡിനെ ആറുമാസത്തേക്ക് സസ്‌പെൻഡ് ചെയ്യാമെന്നാണ് വ്യവസ്ഥ. ഇതിന് കൃത്യമായ മാനദണ്ഡങ്ങളുണ്ടെന്നും അവ പാലിച്ചുകൊണ്ട് സസ്‌പെൻഡ് ചെയ്യാനും ആവശ്യമെങ്കിൽ കാലാവധി നീട്ടാനും സാധിക്കുമെന്നും അദ്ദേഹം വിശദീകരിച്ചു. എന്നാൽ, ബോർഡ് പിരിച്ചുവിടാൻ നിലവിലുള്ള നിയമത്തിൽ വ്യവസ്ഥയില്ലെന്നാണ് പി. രാജീവിന്റെ വാദം.
വഖഫ് ബോർഡിലെ ഏതെങ്കിലും അംഗത്തിന്റെ നിയമനത്തിൽ പിഴവുണ്ടെന്ന കാരണത്താൽ ബോർഡ് ഒന്നാകെ അസാധുവാകുമെന്ന സർക്കാരിന്റെ വ്യാഖ്യാനവും നിയമപരമായി നിലനിൽക്കില്ലെന്ന് അദ്ദേഹം പറഞ്ഞു. ലോകത്ത് ഒരു നിയമവും അംഗീകരിക്കാത്ത അസാധാരണ വ്യാഖ്യാനമാണ് സർക്കാർ മുന്നോട്ടുവയ്ക്കുന്നതെന്നും പി. രാജീവ് ആരോപിച്ചു.
ഏതെങ്കിലും അംഗത്തിന്റെ നിയമനത്തിൽ ക്രമക്കേടുണ്ടെന്ന് കണ്ടെത്തിയാൽ കോടതിക്ക് ആ നിയമനം റദ്ദാക്കാനും ബന്ധപ്പെട്ട വ്യക്തിയെ മാറ്റാനും ആവശ്യമായ നടപടികൾ സ്വീകരിക്കാനും കഴിയും. എന്നാൽ, അതിന്റെ പേരിൽ വഖഫ് ബോർഡ് പൂർണമായി പിരിച്ചുവിടുന്നത് നിയമപരമായി നിലനിൽക്കുന്നതല്ലെന്നും അദ്ദേഹം വ്യക്തമാക്കി.
